ڪراچي (ويب ڊيسڪ) پاڪستان پيپلز پارٽي جي چيئرمين ۽ اڳوڻي پرڏيهي وزير بلاول ڀٽو زرداري چيو آهي ته شهيد بينظير ڀٽو هميشه صحافين جي تحريڪ سان گڏ بيٺي.
ڪراچي ۾ هڪ تقريب کي خطاب ڪندي هن چيو ته پاڪستان ايئرفورس ڀارتي فضائيه کي شڪست ڏني، جڏهن ته صحافين جي تنظيم پي ايف يو جي هڪ تحريڪ آهي، صحافين ڀارت خلاف جنگ ۾ اهم ڪردار ادا ڪيو.
بلاول ڀٽو زرداري جو چوڻ هو ته اڄ به صحافتي آزاديءَ بابت چئلينج موجود آهن، ڊِس ۽ مِس انفارميشن هاڻ هڪ هٿيار بڻجي چڪو آهي.
هن چيو ته ايم آر ڊي تحريڪ دوران صحافين احتجاجي تحريڪن ۾ ڀرپور حصو ورتو، جڏهن ته ڊجيٽل ميڊيا تان پابنديون هٽائڻ مثبت قدم آهي.
پ پ چيئرمين وڌيڪ چيو ته ڀارت خلاف جنگ دوران پاڪستاني صحافين سچائي، ساک ۽ تصديقي خبرن کي اهميت ڏني. اميد آهي ته وفاقي حڪومت صحافين جي اهميت کي سمجهي پنهنجين پاليسين تي نظرثاني ڪندي.
