ڪراچي (رپورٽر) سنڌ جي وڏي وزير سيد مراد علي شاهه چيو آهي ته وفاقي حڪومت، صوبائي سرڪاري ادارن جي شاندار ڪارڪردگي کي نظر ۾ رکندي سندس حڪومت کي 9 ارب رپيا جاري ڪيا آهن.هي رقم رحيم يار خان ۽ راولپنڊي ۾ ايس آءِ يو ٽي جي قيام، بلوچستان ۽ خيبرپختونخوا جي ٻوڏ متاثرن لاءِ گهرن جي ٻيهر تعمير، ۽ ايس زيڊ اي بي آءِ ايس ٽي ۽ آءِ بي اي جهڙن ادارن جي قيام لاءِ ڏني وئي آهي، جن جي قيام بابت فيصلو پوءِ ڪيو ويندو. وڏي وزير اها ڳالهه وڏي وزيراعليٰ هائوس ۾ ٿيندڙ ڪابينا جي اجلاس دوران ڪئي جنهن ۾ صوبائي وزيرن، صلاحڪارن، خاص مددگارن، چيف سيڪريٽري ۽ لاڳاپيل سيڪريٽرين شرڪت ڪئي. ڪابينا رحيم يار خان ۽ گوجر خان تعلقي، راولپنڊي ۾ ٻه ايس آءِ يو ٽي (گردن جي اسپتال) مرڪزن جي قيام جي تجويز جي منظوري ڏئي ڇڏي. وڏي وزير سيد مراد علي شاهه چيو ته هي قدم پاڪستان ۾ صحت جي سهولتن کي بهتر بڻائڻ لاءِ کنيو ويو آهي. هن منصوبي لاءِ صوبائي ڪابينا رحيم يار خان لاءِ ٻه ارب رپيا ۽ راولپنڊي لاءِ هڪ ارب رپيا منظور ڪيا جڏهن ته سالياني آپريٽنگ خرچن لاءِ 50 ڪروڙ رپيا اضافي طور رکيا ويا آهن. وڏي وزير مراد علي شاهه چيو وفاقي حڪومت پاران ڏنل 9 ارب رپين جي فنڊ تحت بلوچستان جي ٻوڏ متاثر علائقن صحبت پور، جعفرآباد ۽ ڊيره مراد جمالي ۾ گهرن جي ٻيهر تعمير لاءِ 2 ارب رپيا رکيا ويا آهن، جڏهن ته خيبرپختونخوا جي ضلعي ڊيرا اسماعيل خان لاءِ هڪ ارب رپيا رکيا ويا آهن. هن منصوبي جي عملدرآمد لاءِ نيشنل رورل سپورٽ پروگرام (NRSP) کي ساٿي طور چونڊيو ويو آهي ڇاڪاڻ ته هي ادارو سمورن صوبن ۾ ڪم ڪري رهيو آهي ۽ تڪڙو امدادي سرگرميون شروع ڪرڻ جي صلاحيت رکي ٿو. بلدياتي کاتي ڪابينا کان ٻه اهم منصوبن لاءِ اضافي فنڊز جي منظوري جي درخواست ڪئي. پهريون منصوبو علامه رشيد ترابي روڊ تي روڊن جي تعمير بهتري، پاڻي جي فراهمي ۽ نيڪالي نظام جي سڌاري سان لاڳاپيل آهي، جنهن لاءِ 53 ڪروڙ 23 لک 10 هزار رپيا رکڻ جي سفارش ڪئي وئي. ٻيو منصوبو ڪريم آباد ۾ هڪ 2+2 لين انڊر پاس جي تعمير بابت آهي، جنهن لاءِ هڪ ارب رپين جي منظوري طلب ڪئي وئي. وڏي وزير مراد علي شاهه ٻنهي منصوبن لاءِ گهربل فنڊن جي منظوري ڏئي ڇڏي .سنڌ جي وڏي وزير سيد مراد علي شاهه جي هدايت تي ڪابينا سنڌ ۾ گاڏين سان لاڳاپيل قانونن ۾ ڪجهه ترميمن جي اصولي منظوري ڏئي ڇڏي آهي. هاڻي هيوي گاڏين تي انهن جي انوائس ويليو جي بنياد تي 0.50 سيڪڙو رجسٽريشن فيس لاڳو ڪئي وئي آهي، سالياني ٽيڪس 1000 رپيا ۽ ٽرانسفر فيس 2000 رپيا مقرر ڪئي وئي آهي جنهن ۾ اسمارٽ ڪارڊ ۽ نمبر پليٽ جي قيمت شامل آهي. سنڌ ۾ هلندڙ سڀني ڪمرشل گاڏين لاءِ فٽنيس سرٽيفڪيٽ حاصل ڪرڻ لازمي قرار ڏنو ويو آهي ۽ ان جي ڀڃڪڙي تي 10 هزار رپين جو ڏنڊ لاڳو ٿيندو. ان کان علاوه پراڻين گاڏين لاءِ پرمٽ جاري ڪرڻ تي نوان ضابطا لاڳو ڪيا ويا آهن جن تحت 20 سالن کان وڌيڪ پراڻيون گاڏيون بين الصوبائي روٽس تي، ۽ 25 سالن کان وڌيڪ پراڻيون گاڏيون بين الاضلاعي روڊن تي هلائڻ تي پابندي هوندي. انجڻ ۽ چيئسس جي تياري يا اسمبلنگ لاءِ لائسنس حاصل ڪرڻ لازمي قرار ڏنو ويو آهي جنهن جي سالياني فيس 30 لک رپيا مقرر ڪئي وئي آهي. لائسنس جي تجديد لاءِ 10 لک رپيا سالياني ادا ڪرڻا پوندا جڏهن ته غيرقانوني اسمبلنگ يا مينوفيڪچرنگ جي صورت ۾ 10 لک رپين جو ڏنڊ لاڳو ٿيندو. سڀ ڏنڊ رڳو ايڪسايز کاتي جي ايپ ذريعي آن لائن ادا ڪرڻ لازمي هوندو. ٽريفڪ قانونن جي وڌيڪ سڌاري لاءِ هاڻي وڏين گاڏين (HTV) جي ڊرائيورن لاءِ گهٽ ۾ گهٽ 30 ڪلاڪن جي حڪومت پاران تسليم ڪيل ادارن مان تربيت حاصل ڪرڻ لازمي قرار ڏني وئي آهي. اسپشل منشيات ڪنٽرول ۽ عورتن جي بااختياري لاءِ قدمن جي منظوري؛ خاص منشيات ڪنٽرول؛ ڪابينا کي آگاهه ڪيو ويو ته سنڌ ۾ منشيات جا وڌندڙ ڪيس هڪ ڳنڀير مسئلو بڻجي چڪا آهن. هيستائين 9676 ڪيس رپورٽ ٿيا آهن جن مان 7769 ڪيس رڳو ڪراچي ڊويزن ۾ التوا جو شڪار آهن. هن چئلينج کي منهن ڏيڻ لاءِ ڪابينا ۾ خاص عدالتن جي قيام جي تجويز پيش ڪئي وئي. تجويز موجب ڪراچي ۾ ٽي خاص عدالتون قائم ڪيون وينديون جڏهن ته ٻين ڊويزنن – حيدرآباد، سکر، لاڙڪاڻو ۽ ميرپورخاص ۾ هڪ هڪ عدالت قائم ٿيندي. سنڌ ڪابينا وزيراعظم جي عورتن جي بااختيار واري پيڪيج ۾ شموليت جي اصولي منظوري ڏئي ڇڏي. انڪلوسيو سٽي: معذورن لاءِ انقلابي منصوبو؛ انڪلوسيو سٽي وڏي وزير جو هڪ انقلابي منصوبو آهي، جيڪو معذور ماڻهن جي ضرورتن کي نظر ۾ رکندي تيار ڪيو ويو آهي. ڪابينا اڳ ئي ان منصوبي جي منظوري ڏئي چڪي آهي جنهن تحت هڪ اهڙو شهر تعمير ٿيندو جتي معذورن لاءِ خاص طبي ۽ بحالي جون سهولتون، تعليمي ادارا ۽ گرين علائقا موجود هوندا. وڏي وزير ان منصوبي لاءِ ضلعي ڪورنگي ۾ 75 ايڪڙ زمين رکي ڇڏي جنهن ۾ وڌيڪ 13.38 ايڪڙ شامل ڪري ڪل ايراضي 88.38 ايڪڙ ڪيو ويو آهي . مٺو پاڻي فراهمي اسڪيم ٿر لاءِ هڪ اهم منصوبو آهي جنهن جو مقصد عمرڪوٽ ۽ ٿرپارڪر جي مقامي آباديءَ کي صاف پيئڻ جو پاڻي فراهم ڪرڻ آهي. ان منصوبي جو بجيٽ 7,622.305 ملين رپيا رکيو ويو آهي .سنڌ ڪابينا صلاح مشوري کانپوءِ اروڙ يونيورسٽي ايڪٽ ۾ ترميمن جي منظوري ڏئي ڇڏي. انهن ترميمن تحت يونيورسٽي کي فن، تعمير، ڊيزائن، ورثو، سائنسز ۽ انجنيئرنگ سميت مختلف شعبن ۾ ڪلاس وٺڻ ۽ ڊگريون جاري ڪرڻ جو اختيار حاصل ٿي ويو آهي. اجلاس کان پوءِ ميڊيا کي بريفنگ ڏيندي سنڌ جي مڪاني ادارن واري وزير سعيد غني ۽ ايڪسايز ۽ ٽيڪسيشن واري وزير مڪيش ڪمار چاولا چيو آهي ته سنڌ حڪومت پنجاب ۽ بلوچستان ۾ ايس آءِ يو ٽي ۽ ٻوڏ متاثرن لاءِ گهر وفاقي حڪومت جي فنڊز مان پنهنجي ادارن ذريعي ٺهرائي رهي آهي، هي تاثر مڪمل طور غلط آهي ته سنڌ حڪومت پنهنجن فنڊن مان اتي ڪم ڪرائي رهي آهي. صوبي ۾ ٽريفڪ جي قانونن تي عمل ڪرائڻ، حادثن جي روڪٿام، 33 لک کان وڌيڪ موٽر سائيڪل هلائيندڙن جي بنا لائسنس هلندڙ موٽر سائيڪلن ۽ 63 هزار کان وڌيڪ غير رجسٽرڊ چنگچي رڪشن جي رجسٽريشن سميت ٻين معاملن بابت سخت قانون تيار ڪيا پيا وڃن. شاہراه ڀٽو ڀرسان 88 ايڪڙ زمين معذورن لاءِ مختص ڪئي وئي آهي ۽ ان جي ماسٽر پلان جي منظوري پڻ ڏني وئي آهي، ان کي SEPA مان مستثنيٰ به قرار ڏنو ويو آهي. سعيد غني چيو ته ميڊيا ۽ سوشل ميڊيا تي سنڌ حڪومت تي تنقيد ڪئي وئي ته هو ڪي پي، پنجاب ۽ بلوچستان ۾ پيسا خرچ ڪري رهي آهي، جڏهن ته حقيقت هي آهي ته SIUT گجر خان ۽ رحيم يار خان ۾ وفاقي حڪومت جي فنڊ سان ٺهندا، صرف ادارا سنڌ حڪومت جا هلندا. وزارتن ۾ تبديلي بابت سعيد غني چيو ته اهو اختيار پارٽي قيادت ۽ وزيراعليٰ وٽ هوندو آهي، ۽ سوشل ميڊيا تي هلندڙ خبرن بابت هن چيو ته ايندڙ ڪجهه ڏينهن ۾ اهڙي ڪا تبديلي نه ٿي رهي آهي.
