ڪوئيٽا (ويب ڊيسڪ) ڪوئيٽا کان پشاور ويندڙ جعفر ايڪسپريس تي دهشتگردن جي حملي کانپوءِ سيڪيورٽي فورسز ڪليئرنس آپريشن ڪري 80 يرغمالين کي آزاد ڪرائي ورتو.
سيڪيورٽي ذريعن موجب آزاد ٿيندڙن ۾ 43 مرد، 26 عورتون ۽ 11 ٻار شامل آهن، جڏهن ته ٻين مسافرن جي حفاظت سان آزادي لاءِ ڪوششون ڪيون پيون وڃن.
سيڪيورٽي ذريعن جو چوڻ آهي ته فورسز ۽ دهشتگردن ۾ فائرنگ جي ڏي وٺ جاري آهي، هيل تائين 13 دهشتگرد مارجي ويا آهن ۽ ڪيترائي زخمي ٿيا آهن.
سيڪيورٽي ذريعن موجب آپريشن سبب دهشتگرد ٽولين جي صورت ۾ ورهائجي ويا آهن، جڏهن ته زخمي مسافرن کي ويجهي اسپتال منتقل ڪيو ويو آهي.
سيڪيورٽي ذريعن جو چوڻ آهي ته دهشتگردن جو گهيرو تنگ ڪيو ويو آهي ۽ آخري دهشتگرد جي خاتمي تائين آپريشن جاري رهندو.
هوڏانهن ريلوي اختيارين جو چوڻ آهي ته جعفر ايڪسپريس 9 بوگين تي ٻڌل آهي ۽ ان ۾ 4 سئو کان وڌيڪ مسافر سوار آهن، ريل گاڏي صبح نائين وڳي ڪوئيٽا کان رواني ٿي هئي.
