ڪرائسٽ چرچ (ويب ڊيسڪ ) ڪيوي اوپنر مارٽن گپٽل باظابطا طور تي عالمي ڪرڪيٽ تان رٽائرمينٽ جو اعلان ڪري ڇڏيو.
نيوزيلينڊ ڪرڪيٽ طرفان جاري ڪيل بيان مارٽن گپٽل چيو ته ” هڪ نوجوان طور تي هميشه کان نيوزيلينڊ جي نمائندگي ڪرڻ خواب رهيو، پنهنجي ملڪ لاءِ 367 ميچون کيڏڻ تي تمام گهڻي خوشي ۽ فخر آهي. “
هن چيو ته ” مان سدائين انهن املهه ڏينهن ساراهيندس جيڪي مون عظيم ڪيوي رانديگرن سان گڏ گذاريا.“
مارٽن ساٿي ڪرڪيٽرن ۽ ڪوچنگ اسٽاف جو ٿورا شڪريو ادا ڪندي چيو ته هو خاص طور تي مارڪ اوڊنل جو ٿورائتو آهي جنهن هن کي انڊر 19 سطح کان ڪوچ ڪيو ۽ ڪيريئر دوران مسلسل حمايت ڪئي.
هن چيو ته ” مان پنهنجي گهرواري لورا ۽ ٻارن جو پڻ ٿورائتو آهيان، جن سدائين ساٿ ڏنو، لورا منهنجي سڀ کان وڏي طاقت ۽ صلاحڪار رهي.“
هن وڌيڪ چيو ته ” مان نيوزيلينڊ ۽ سڄي دنيا جي ڪرڪيٽ مداحن جو ٿورائتو رهندس جن ڪيئي ورهين تائين مون کي سپورٽ ڪيو. “
مارٽن گپٽل نيوزيلينڊ لاءِ 198 ون ڊي ميچن ۾ 7346، 122 ٽي ٽوئنٽي مقابلن ۾ 3531 ۽ 47 ٽيسٽ ۾ 2586 رنسون ٺاهيون.
واضح رهي ته 38 ورهين جي ڪيوي ڪرڪيٽر آخري ڀيرو قومي ٽيم جي نمائندگي آڪٽوبر 2022ع ڪئي هئي، هو ليگ ڪرڪيٽ جاري رکندو.
