اسلام آباد (ويب ڊيسڪ ) اسلام آباد جي دهشتگردي ٽوڙ عدالت صحافي مطيع الله جان جي ضمانت منظور ڪري ورتي.
ٻه ڏينهن اڳ اسلام آباد مان گرفتار ڪيل صحافي مطيع الله جان کي دهشتگردي ٽوڙ عدالت جي جج طاهر عباس سِپرا جي روبرو پيش ڪيو ويو.
ٻڌڻي دوران جج طاهر عباس سپرا چيو ته اسلام آباد هاءِ ڪورٽ جي حڪمنامي جي ڪاپي ڏيو، روبڪار ڪٿي آهي؟ جاچ آفيسر حڪمنامي کي رڪارڊ سان لڳائي ڇڏي، مطيع الله جان کي جڊيشل رمانڊ تي موڪلي رهيون آهيان.
صفائي واري وڪيل چيو ته هنن ضمانت جي درخواست داخل ڪئي آهي ۽ اڄ ئي ٻڌڻي ڪيو، جنهن تي جج چيو ته اوهان جي ضمانت جي درخواست 7 صفحن تي ٻڌل آهي نوٽيس ڪري رهيون آهيان.
پراسيڪيوٽر راجا نويد عدالت کان صحافي مطيع الله جان جي ضمانت رد ڪرڻ جي استدعا ڪئي، جڏهن ته عدالت صحافي جي ضمانت جي درخواست منظور ڪندي کيس ڏهه هزار رپين جا مچلڪا جمع ڪرائڻ جو حڪم ڏنو.
