اسلام آباد (م ڊ) پاڪستان ۾ انعامي اسڪيمن ۽ حڪومتي مراعتن جي باوجود هاري هن سال ڪڻڪ جو فصل پوکڻ کان لنوائي رهيا آهن. حڪومت هلندڙ سال ڪڻڪ جي پوکيءَ جو هدف پورو ڪرڻ ۾ ناڪام رهي آهي. گذريل سال ڪڻڪ جي سرڪاري خريداري نه ٿيڻ سبب هارين کي وڏي مالي نقصان کان پوءِ هن ڀيري ڪڻڪ جي پوک سست آهي. اهو امڪان وڌي رهيو آهي ته قرض ۾ ٻڏل حڪومت کي ملڪي خوراڪ جي ضرورتن کي پورو ڪرڻ لاءِ قيمتي ناڻو خرچ ڪري پرڏيهه مان ڪڻڪ گهرائڻي پوندي. هاري اڳواڻن موجب هن سال ڪڻڪ جو فصل گذريل سال جي ڀيٽ ۾ 20 سيڪڙو گهٽ هجڻ جو امڪان آهي، ڪڻڪ جي پيداوار ۾ 15 سيڪڙو گهٽتائي فصل جي گهٽ ايراضي جي ڪري ٿيندي ۽ 5 سيڪڙو ان جي ڪري ٿيندي جو معاشي مسئلن جو شڪار هڪ عام هاري پنهنجي فصل لاءِ معياري ٻج ۽ مناسب مقدار ۾ ڀاڻ ۽ زرعي دوائون استعمال ڪرڻ جي قابل نه هوندو. پنجاب ۾ ڪڻڪ جي پوک جو سرڪاري هدف جو اڌ به حاصل نه ٿي سگهيو آهي. هارين موجب حڪومت ڪڻڪ جي فصل جي سٺي پيداوار حاصل ڪرڻ لاءِ سنجيده آهي ته فوري طور تي ڪڻڪ جي امدادي قيمت جو اعلان ڪري.
