سکر (رپورٽر) توانائي، منصوبابندي ۽ ترقي واري صوبائي وزير سيد ناصر حسين شاھ چيو آهي ته پي ٽي آءِ پنهنجو احتجاج رڪارڊ ڪرائي ڇڏيو آهي، هاڻي گهر وڃن، اھڙو اظھار ھن سکر آءِ بي اي يونيورسٽي ۾ پهرئين OGDCL نيشنل ڪيس رائيٽنگ ڪمپيٽيشن جي تقريب دوران ميڊيا سان ڳالهائيندي ڪيو. هن چيو ته جيڪڏهن مسلم ليگ (ن) جي حمايت نه ڪريون ھا ته اسان کي ٻيھر نئين اليڪشن ۾ وڃڻو پوي ھا، جنهن لاءِ اسان کي ڪڙو ڍڪ ڀرڻو پيو، پي ٽي آءِ جو مستقبل سندن پرامن ٿيڻ ۾ آھي. نون ڪينال واري معاملي تي هن چيو ته پاڪستان پيپلز پارٽي پوري ملڪ جي پارٽي آهي، سنڌ جي ڪنهن به شيءِ تي سوديبازي نه ڪندي، خاص ڪري پاڻي اسان جي بقاءَ جو معاملو آهي، پاڪستان پيپلز پارٽي ڪڏهن به ايئن نه چاھيندي ته اهڙي قسم جي ڪا شيءِ ٺھي، ان موقعي تي سکر آءِ بي اي يونيورسٽي جي وائيس چانسلر پروفيسر ڊاڪٽر آصف احمد شيخ خطاب ڪندي چيو ته پاڪستان ۾ پهريون ڀيرو سکر آءِ بي اي يونيورسٽي ۾ او جي ڊي سي ايل جي سهڪار سان نيشنل ڪيس رائيٽنگ مقابلا ڪرايا پيا وڃن، ريجنل ڊائريڪٽر او جي ڊي سي ايل قمر زمان خطاب ڪندي چيو ته او جي ڊي سي ايل جو تعليم ۽ صحت جي شعبي تي ڌيان آهي.
