لاڙڪاڻو (رپورٽ: عبدالوحيد ابڙو) لاڙڪاڻي جي وليد ٿاڻي جي لاڪ اپ مان گرفتار نوجوان جو لاش هٿ اچڻ جي معاملي ۾ فرسٽ ايڊيشنل جج اڳوڻي ايس ايڇ او سميت 7 ڄڻن خلاف ڪيس داخل ڪرڻ جو حڪم ڏئي ڇڏيو.
ڪجهه ڏينهن اڳ ڪبوتر چوري جي الزام ۾ گرفتار نوجوان ساحل سولنگي جو لاڪ اپ مان لاش هٿ آيو هو ۽ وليد ٿاڻي جي پوليس واقعي کي آپگهات جو رنگ ڏنو هو.
پ پ چيئرمين بلاول ڀٽو زرداري ۽ آءِ جي سنڌ غلام نبي ميمڻ واقعي جو نوٽيس وٺندي اختيارين کي جاچ جو حڪم ڏنو هو، جڏهن ته مقتول جي وارثن عدالت سان رابطو ڪيو هو.
اڄ فرسٽ ايڊيشنل جج اڳوڻي ايس ايڇ او عبدالرزاق ٽڳڙ، اهلڪار حبدار چانڊيو، علي حسن ڪهيري، سندس ٻن پٽن شاھه جهان ۽ رابيل ڪهيري سميت ٻن اڻڄاتل جوابدارن خلاف قتل ڪيس داخل ڪرڻ جو حڪم ڏئي ڇڏيو.
واضح رهي ته بااثر علي حسن ڪهيري مقتول نوجوان ساحل سولنگي تي ڪبوتر چوري جو الزام هنيو هو.
