خيرپور/پيرجوڳوٺ (مختيار ڦلپوٽو/وسيم سنڌي) ڪنگري جي ڪچي جي ڳوٺ هيبت خان بروهي ۾ 10 گهر ڀاتين سميت 13 ڄڻن کي زهر ڏئي مارڻ واري معاملي نئون رخ اختيار ڪري ورتو. برادي جتوئي پوليس مقتول گل بيگ بروهي جي ڌيءَ شائستا بروهي ۽ سندس سئوٽ امير بخش بروهي کي گرفتار ڪري ورتو. پڇا ڳاڇا بعد گرفتار جوابدارن ڏوھ جو اعتراف ڪري ورتو. پوليس سب انسپيڪٽر خير محمد گوندل جي فرياد تي ناري ۽ نوجوان مٿان ڪيس داخل ڪيو ويو. پوليس ڪيس ۾ ڄاڻايو آهي ته مقتول گل بروهي کان سندس ڀائٽئي امير بخش بروهي نياڻي شائسته بروهي جو سڱ گهريو رشتو نه ملڻ تان ناري ۽ نوجوان کاڌي ۾ زهر ملايو جنهن سبب گل بيگ بروهي، سندس زال، پنج معصوم نياڻيون ۽ سندس 3 پٽ جڏهن ته جوابدار امير بخش بروهي جو پيءُ، سندس معصوم ڀاڻيجو۽ پاڙيسري سميت 13 ڄڻا فوت ٿي ٿيا. گرفتار جوابدارن موجب هو شادي ڪرڻ چاهين پيا پر ناري جي پيءُ انڪار ڪيو هو جنهن کانپوءِ نوجوان اٽي ۽ کير ۾ زهر ملائي گهرڀاتين کي ڏنو. مهينو اڳ واقعو پيش آيو هو، ڊاڪٽرن کاڌي پيتي جي شين جا نمونا ورتا هئا، رپورٽ پڌري ٿيڻ کانپوءِ پوليس ڪارروائي ڪئي.
