ڪراچي (ويب ڊيسڪ) سيف سٽي منصوبي تحت پول سائٽس ۽ ڪئميرائن سان ڪراچي شهر جي مانيٽرنگ شروع ڪئي وئي.
وڏي وزير مراد علي شاهه کي سيف سٽي منصوبي بابت بريفنگ ۾ ٻڌايو ويو ته 7 پول سائٽس ڪم شروع ڪري ڇڏيو آهي ۽ 35 ڪئميرائن سان شهر جي مانيٽرنگ ڪئي پئي وڃي.
بريفنگ ۾ ٻڌايو ويو ته سي پي او ۾ قائم ڪنٽرول روم ۾ ڊيٽا سينٽر جا اوزار ۽ وڊيو وال لڳائي وئي آهي ۽ شهر جي مختلف علائقن ۾ 1300 ڪئميرائون لڳايون وينديون.
بريفنگ ۾ اهو به ٻڌايو ويو آهي ته شڪي گاڏين ۽ جوابدارن جي سڃاڻپ آرٽيفيشل انٽيليجنس جي مدد سان ڪئي ويندي، 18 ٿاڻن ۾ پرابلم اوريئنٽڊ پوليسنگ ٿيندي، پي او پي سائٽس جي ٺاهه جوڙ شروع ڪئي وئي آهي.
بريفنگ ۾ ٻڌايو ويو ته جديد ڪئميرا ۽ مانيٽرنگ سسٽم سميت سمورو سامان ڪراچي پهچي ويو آهي، 5 ايمرجنسي ريسپانس گاڏيون حاصل ڪيون ويون آهن، ان کانسواءِ ڪراچي پوليس آفيس ڀرسان سنڌ سيف سٽي اٿارٽي جي هيڊ ڪوارٽر جي تعمير شروع ڪئي وئي آهي.
