راولپنڊي (ويب ڊيسڪ) پي ٽي آءِ باني عمران خان چيو آهي ته اسرائيل جي حوالي سان منهنجو موقف اڄ به اهو ئي آهي، فلسطين ۾ ماڻهن جي نسل ڪشي ڪئي پئي وڃي، اسرائيلي آرٽيڪل ۾ منهنجي تعريف ڪئي وئي آهي، لڳي ٿو ته انهن کي انگريزي سمجهه ۾ نٿي اچي.
اڊيالا جيل ۾ صحافين سان ڳالهائيندي عمران خان چيو ته ڪالهه کان پروپئگنڊا جاري آهي ۽ اسرائيلي اخبار جو حوالو ڏنو پيو وڃي ته مان اسرائيل سان لاڳاپن جو وڏو حامي آهيان، آرٽيڪل ۾ منهنجي تعريف ڪئي وئي آهي، لڳي ٿو ته انهن کي انگريزي سمجهه ۾ نٿي اچي، اسرائيلي اخبار مسلم امت ۽ اولهه ملڪن ۾ منهنجي ساک جي حوالي سان ڳالهه ڪئي آهي.
هن چيو اسرائيل جي حوالي سان منهنجو موقف اڄ به اهو ئي آهي ته فلسطين ۾ ماڻهن جي نسل ڪشي ٿي رهي آهي، اڳ ۾ جنگبندي ڪئي وڃي پوءِ ئي ڳالهيون ٿي سگهن ٿيون، اڳ ۾ ٻه رياستي حل ڏانهن وڃو پوءِ ڳالهيون ٿينديون.
