ڪراچي (ذوالفقار ٻٻر) اڳوڻي فوجي آمر جنرل ضياءُ الحق پنهنجي مارشل لا دوران پيپلزپارٽي جي ايم آر ڊي تحريڪ کي ڪچلڻ ۽ ان ڏانهن عوام جو ڌيان هٽائڻ لاءِ ڏکڻ پنجاب ۽ اتر سنڌ جي ڪچي واري علائقي ۾ ڌاڙيل پاليا. ضيا حڪومت ڪچي ۾ کين آباد ڪيو، جنهن بعد سندن رابطو ڪي پي ۽ افغانستان جي دهشتگردن سان ڪرايو. ان چين وسيلي ملڪ ۾ هٿيار ۽ منشيات سميت هر برائي آئي. ڌاڙيل ڪلچر پئدا ڪرڻ جو مقصد ايم آر ڊي تحريڪ کي نقصان پهچائڻ هو ته جيئن پ پ اقتدار ۾ نه اچي سگهي، پوءِ انهن جي سرپرستي وڏيرن ۽ جاگيردارن حوالي ڪئي وئي. جن پنهنجيون پاٿاريون ٺاهيون ۽ ڌاڙيلن کي استعمال ڪيو. ضياءُ حڪومت جي خاتمي کانپوءِ ڪجهه ڌاڙيل پاليندڙ وڏيرا شهيد بينظير ڀٽو جي دور ۾ پيپلزپارٽي ۾ آيا پر سندس شهادت کانپوءِ آصف زرداري جي سربراهيءَ ۾ سمورا سردار، وڏيرا ۽ جاگيردار پ پ ۾ شامل ٿي ويا آهن. هاڻي انهن وڏيرن جو ڌاڙيلن تي هٿ آهي. کين افغانستان ۽ ڪي پي ڪي مان اينٽي ايئر ڪرافٽ گنز ۽ ٻيا جديد هٿيار ملن. هنن وٽ فوج جي مقابلي جهڙا هٿيار موجود آهن، جيڪي پوليس وٽ به ناهن. پوليس ۽ رينجرز ۾ به ڌاڙيلن جا مخبر آهن. ڌاڙيلن خلاف گرينڊ آپريشن جو اختيار رينجرز حوالي ڪيو وڃي ۽ ان جي نگراني ڪراچي جي ڪور ڪمانڊر حوالي ڪئي وڃي.