ڪراچي (ويب ڊيسڪ) پ پ اڳواڻ فيصل ڪريم ڪنڊي چيو آهي ته اسان جي بنا ڪا حڪومت نٿي ٺهي سگهي، تنهن ڪري پارٽي چاهي ٿي ته بلاول وزيراعظم ٿئي.
نجي ٽي وي چئنل جي پروگرام ۾ ڳالهائيندي فيصل ڪريم ڪنڊي چيو پ پ قيادت جو موقف آهي ته بلاول ڀٽو وزيراعظم جو اميدوار هجي، ڇو ته ڪو به ان پوزيشن ۾ ناهي ته اسان جي بنا حڪومت ٺاهي، جيڪڏهن ن ليگ جي ڳالهه آهي ته عددي اڪثريت ته پي ٽي آءِ جي حمايت يافته آزاد اميدوارن کي به حاصل آهي پر ڪو به حڪومت ٺاهڻ جي پوزيشن ۾ ناهي.
هن چيو ته سي اي سي اجلاس ۾ تجويزون سامهون رکيون وينديون، جنهن کانپوءِ فيصلو ڪيو ويندو پر پنهنجي ذاتي تجويز آهي ته جيڪڏهن بلاول وزيراعظم نٿو ٿئي ته بهتر آهي اسان حڪومت جو حصو نه بڻجون ۽ اپوزيشن ۾ ويهون.
سندس چوڻ هو اهو به ٿي سگهي ٿو ته اسان ن ليگ جي وزيراعظم کي ووٽ ڏيون ۽ اپوزيشن ۾ ويهون، اپوزيشن ليڊر جو عهدو ڀلي اسان وٽ نه هجي پر سٺي اپوزيشن ڪري سگهون ٿا.
فيصل ڪريم ڪنڊي چيو ته ملڪي معاشي ۽ سيڪيورٽي صورتحال تمام گهڻي خراب آهي، حڪومت ڪيترن ئي چئلينجن کي منهن ڏيندي، ايندڙ حڪومت ڪيترن ئي مسئلن جو شڪار به هوندي، ان وٽ اڪثريت به نه هوندي.
