اسلام آباد (ويب ڊيسڪ) نيشنل اليڪٽرڪ پاور ريگيوليٽري اٿارٽي (نيپرا) چيو آهي ته بجلي ڪمپنين ۾ 781 ارب رپين جي سيڙپڪاري باوجود صورتحال بهتر نه ٿي، ناقص منصوبابندي سبب عوام تي بار پيو.
نيپرا پاور سيڪٽر جي اسٽيٽ آف انڊسٽري رپورٽ 2023 جاري ڪري ڇڏي، جنهن ۾ بجلي جي پيداوار ۽ پهچ ورهاست ۾ نااهلي، ٻارڻ جي فراهمي پاور سيڪٽر جا وڏا مسئلا قرار ڏنا ويا.
رپورٽ ۾ انڪشاف ڪيو ويو آهي ته پراڻا ۽ خراب ڪارڪردگي وارا پلانٽ مدو پورو ٿيڻ باوجود هلايا پيا وڃن، پاور سيڪٽر ۾ ڊگهي مدي جي منصوبابندي جي کوٽ آهي پر ان جو بار واهپيدارن تي نه وجهڻ گهرجي، گذريل سال مختلف وڏن شهرن ۾ 12-12 ڪلاڪن کان وڌيڪ لوڊشيڊنگ ڪئي وئي.
نيپرا چيو آهي ته بجلي ڪمپنين ۾ 781 ارب رپين جي سيڙپڪاري باوجود صورتحال بهتر نه ٿي، بجلي جي شعبي ۾ نجي شعبي جي مداخلت سان بهتري آڻي سگهجي ٿي.
رپورٽ موجب هڪ سال ۾ ميرٽ آرڊر جي ڀڃڪڙي سان 20 ارب 26 ڪروڙ رپين، گئس ۽ ايل اين جي جي کوٽ سان مهانگا پلانٽ هلائڻ سان 164 ارب رپين ۽ پهچ نظام جي خرابين سان 20 ارب 20 ڪروڙ رپين جو واڌو بار پيو.
نيپرا چيو آهي ته بهتر منصوبابندي سان عوام ان بار کان بچي وڃي ها.
رپورٽ ۾ ٻڌايو ويو آهي ته سال 2023 ۾ پهچ نظام جي خرابين سان 20 ارب 20 ڪروڙ رپين کان وڌيڪ جو بار پيو، جڏهن ته گذريل سال بجلي جا ٽاور ڪِرڻ جا 38 وڏا واقعا پيش آيا.
