ڪراچي (ويب ڊيسڪ) بحريا ٽائون عملدرآمد ڪيس ۾ 460 ارب رپيا جمع ڪرائڻ جي معاملي تي سنڌ حڪومت سپريم ڪورٽ سان رابطو ڪري ورتو.
سپريم ڪورٽ 21 مارچ 2019 ۾ بحريا ٽائون طرفان ملير ڊويلپمينٽ اٿارٽي (ايم ڊي اي) ۾ 16 هزار ايڪڙ زمين جي خريداري لاءِ 460 ارب رپين جي آڇ قبول ڪئي هئي، جنهن تي هاڻ سنڌ حڪومت حق جي دعويٰ ڪري ڇڏي آهي.
سنڌ حڪومت طرفان سپريم ڪورٽ ۾ جمع ڪرايل ڌار درخواست ۾ اپيل ڪئي وئي آهي ته بحريا ٽائون طرفان سپريم ڪورٽ ۾ جمع ڪرايل رقم سنڌ حڪومت کي ڏني وڃي.
درخواست ۾ چيو ويو آهي ته سپريم ڪورٽ ۾ جمع رقم سنڌ حڪومت جي آهي، سنڌ حڪومت کي ترقياتي منصوبن جي سخت ضرورت آهي.
سنڌ حڪومت پنهنجي درخواست ۾ موقف اختيار ڪيو آهي ته سپريم ڪورٽ پنهنجي 4 مئي 2018 جي فيصلي ۾ 16 هزار ايڪڙ جي ملڪيت سنڌ حڪومت جي تسليم ڪري چڪي آهي ۽ بحريا ٽائون جي قسطن ۾ دير جي الڳ درخواست 2020 ۾ رد ڪري چڪي آهي.
سنڌ حڪومت درخواست ۾ چيو آهي ته بحريا ٽائون جي نئين درخواست جو مقصد قسطن جي ادائيگين ۾ دير آهي، بحريا ٽائون 16 هزار ايڪڙ عيوض 460 اربن جون قسطون جمع ڪرائڻ جو پابند آهي، سپريم ڪورٽ ادائيگي جو حڪم بحريا ٽائون جي رضامندي سان ڏنو.
