اسلام آباد (ويب ڊيسڪ) اسلام آباد هاءِ ڪورٽ چيو آهي ته گم ٿيل ماڻهن جا ڪيس دنيا ۾ پاڪستان جي نالي تي ڪارو چُٽو لڳائي رهيا آهن، ڪو ملڪ توهان کي ڊالر نه ڏيندو جيڪڏهن توهان جا شهري محفوظ نه هوندا.
اسلام آباد هاءِ ڪورٽ جي چيف جسٽس عامر فاروق ۽ جسٽس ميان گل حسن اورنگزيب تي ٻڌل بئنچ صحافي مدثر نارو ۽ ٻين جي آزادي جي درخواستن تي ٻڌڻي ڪئي.
ايڊيشنل اٽارني جنرل چيو ته اٽارني جنرل اڄ موجود ناهي، ايندڙ ٻڌڻي تي دليل ڏيندو.
عدالتي مددگار فيصل صديقي چيو ته انٽيليجنس ايجنسيون عدالت سامهون چونديون آهن ته اسان ناهي کنيو، هر ڪو ڄاڻي ٿو ته انٽيليجنس ايجنسيون ماڻهن کي گم ڪنديون آهن، عدالتن کي شهرين کي گم ڪرڻ جو عمل ڪنهن به صورت ۾ برداشت نه ڪرڻ گهرجي.
عدالت چيو ته هر هر هدايتون جاري ڪندا آهيون پر ڪو عمل نه پيو ٿئي، ماڻهو گم ٿي ويندا آهن پر رياست ڪجهه ناهي ڪندي، رياست طاقتور آهي پر گم ٿيلن جي ڪيسن ۾ چوندي آهي ته اسان ڪجهه نٿا ڪري سگهون.
چيف جسٽس عامر فاروق چيو ته 5 سالن کان اهي اپيلون ٻڌڻي هيٺ آهن، اسان کي ائين ويهندي به لڄ ٿيندي آهي، ماڻهن جو گم ٿيڻ ملڪ جي بدنامي جو ڪارڻ بڻجي ٿو.
جسٽس ميان گل حسن اورنگزيب چيو ته اهڙن ڪيسن سان پاڪستان جي نالي تي ڪارو چُٽو لڳي رهيو آهي، ڪو ملڪ توهان کي ڊالر نه ڏيندو جيڪڏهن توهان جا شهري محفوظ نه هوندا، وزيراعظم به پيش ٿي هن عدالت کي گمراهه ڪيو، وزيراعظم ايندو ته ان جون ترجيحون ڪجهه ٻيون هونديون.
ايڊيشنل اٽارني جنرل چيو ته ان معاملي تي ڪميٽي جوڙي وئي آهي، سنجيده ڪوششون ڪيون پيون وڃن.
چيف جسٽس چيو ڪميٽي ٺهي ته پوءِ ڇا ٿيو سڀني کي خبر آهي، عملي ڪم ڪيو.
جسٽس ميان گل حسن چيو اٽارني جنرل وزيراعظم سان ملي ۽ اڳڀرائي تي رپورٽ وٺي اچي، اٽارني جنرل ايندڙ ٻڌڻي تي عدالت جي مدد ڪري.
ڪيس جي ٻڌڻي ٻن هفتن لاءِ ملتوي ڪئي وئي.
