نئين دهلي (ويب ڊيسڪ) روسي صدر ولاديمير پيوٽن، چيني صدر شي جن پنگ ۽ ايراني صدر مسعود پزشڪيان سميت عالمي اڳواڻ برڪس سربراهي اجلاس لاءِ هن وقت دهلي ۾ موجود آهن.
هي گروپ آمريڪا ۽ اولهه يورپ لاءِ هڪ توازن فراهم ڪرڻ جي مقصد سان جوڙيو ويو هو، پر وچ اوڀر جي جنگين برڪس اتحاد ۾ ڏار وجهي ڇڏيا آهن.
هي سربراهي اجلاس برڪس لاءِ هڪ موقعو آهي ته هو اولهه لاءِ سياسي ۽ معاشي توازن طور پنهنجي حيثيت ظاهر ڪري، پر ساڳئي وقت اهو اتحاد لاءِ هڪ وڏو امتحان پڻ آهي.
عالمي تڪرارن برڪس ۾ موجود گهري ورهاست کي وائکو ڪري ڇڏيو آهي. مثال طور گڏيل عرب امارتن هن سال ايران جي ڪيترن ئي ڊرون ۽ ميزائل حملن جو نشانو بڻيو آهي.
گذريل ڇهن مهينن دوران برڪس جا اجلاس ڪنهن گڏيل بيان تي اتفاق نه ڪري سگهيا آهن، مبينا طور ايران بابت شديد اختلافن ۽ اسرائيل سان لاڳاپيل تڪرارن کي منهن ڏيڻ جي طريقيڪار تي اختلاف ان جو سبب آهن.
هڪ ٻيو مسئلو آمريڪي صدر ڊونلڊ ٽرمپ آهن. واپاري محصول لاڳو ڪرڻ جون سندس ڌمڪيون برڪس جي ميمبر ملڪن لاءِ متحد ٿيڻ کي وڌيڪ اهم بڻائين ٿيون، پر ساڳئي وقت آمريڪا جو مقابلو ڪرڻ انهن لاءِ مهانگو پڻ ثابت ٿي سگهي ٿو.
وائيٽ هائوس برڪس جي ڪجهه تجويزن کي ”آمريڪا مخالف“ قرار ڏنو آهي ۽ ڪيترائي ملڪ آمريڪي صدر کي ناراض ڪرڻ کان پاسو ڪندا.
