لاهور (ويب ڊيسڪ) پنجاب حڪومت سرڪاري کاتن جون دونهون ڇڏيندڙ ۽ گدلاڻ پکيڙيندڙ گاڏيون بند ڪرڻ جو فيصلو ڪيو آهي.
سينيئر صوبائي وزير مريم اورنگزيب جي صدارت هيٺ اجلاس ٿيو، جنهن ۾ فضائي گدلاڻ ۽ چانورن جي فصل جي لاباري کان اڳ هارين کي 10 هزار سپر سيڊرز فراهم ڪرڻ بابت بريفنگ ڏني وئي.
اجلاس ۾ سرڪاري کاتن جون دونهون ڇڏيندڙ ۽ گدلاڻ پکيڙيندڙ گاڏيون بند ڪرڻ، فصلن جي باقيات ساڙڻ، گدلاڻ پکيڙيندڙ ڪارخانن ۽ دونهون ڇڏيندڙ گاڏين خلاف ڪريڪ ڊائون ڪرڻ جو فيصلو ڪيو ويو.
اجلاس ۾ فيصلو ڪيو ويو ته گند ۽ پلاسٽڪ ساڙيندڙن تي ڳرا ڏنڊ مڙهيا ويندا، جڏهن ته ويسٽ برننگ ۾ ملوث ”سٿرا پنجاب“ ڪمپني جو ٺيڪو رد ڪيو ويندو ۽ گند ساڙڻ ۾ ملوث ملازمن خلاف به قانوني ڪارروائي ڪئي ويندي.
ان کانسواءِ سيف سٽي ڪيمرائن ذريعي گند ڪچرو ساڙيندڙن ۽ گدلاڻ پکيڙيندڙن جي نگراني ڪئي ويندي.
اجلاس ۾ باربي ڪيو ۽ فوڊ اسٽريٽس ۾ ماحولياتي تحفظ جي ايس او پيز تي عمل يقيني بڻائڻ، جڏهن ته ماحولياتي تحفظ جي ايس او پيز جي ڀڃڪڙي ڪندڙ ريسٽورنٽ سيل ڪرڻ جو به فيصلو ڪيو ويو.
