اسلام آباد جي پمز اسپتال ۾ باهه لڳڻ سبب 14 نون ڄاول ٻارن جي فوت ٿيڻ واري سانحي کانپوءِ ريسڪيو اختيارين خبردار ڪيو آهي ته راولپنڊي جا وڏا اسپتال پڻ غير محفوظ ۽ باهه جي خطري جو شڪار آهن.
ريسڪيو اختيارين نالو ظاهر نه ڪرڻ جي شرط تي جيو نيوز کي ٻڌايو ته بينظير ڀٽو اسپتال ۽ هولي فيملي اسپتال غير محفوظ آهن، جڏهن ته انهن اسپتالن ۾ باهه کان بچاءَ وارو مڪمل نظام به نصب ناهي ڪيو ويو.
اختيارين موجب پي ڪي ايل آءِ يورالوجي اسپتال جو فائر سيفٽي سسٽم غيرفعال آهي، جڏهن ته راولپنڊي جا ٻيا سرڪاري اسپتال پڻ باهه جي خطري کي منهن ڏئي رهيا آهن.
ريسڪيو اختيارين ٻڌايو ته اسپتالن ۾ هنگامي حالت ۾ ٻاهر نڪرڻ جا رستا نه هجڻ جي برابر آهن. جيڪڏهن ڪنهن اسپتال ۾ هنگامي نڪرڻ جو رستو موجود به آهي ته اهو بند آهي يا ان تي تالا لڳل آهن.
اختيارين موجب اسپتالن ۾ باهه وسائڻ وارن اوزارن جو انگ تمام گهٽ آهي، سرڪاري اسپتالن ۾ باهه جي نشاندهي وارو نظام موجود ناهي، جڏهن ته اسپتالن ۾ فائر هائيڊرنٽس پڻ نصب ناهن ڪيا ويا.
