برسبين (ويب ڊيسڪ)آسٽريلوي بيٽر عثمان خواجا پرٿ ٽيسٽ کان اڳ گولف کيڏي چيلهه جي تڪليف ۾ مبتلا ٿيڻ واري تڪرار کانپوءِ هاڻي هڪ ٻئي ڏچي ۾ به پئجي ويو آهي.
پرڏيهي ميڊيا رپورٽن موجب، عثمان خواجا هاڻي پنهنجي فائونڊيشن جي مانجهاندي دوران پرٿ ٽيسٽ ميچ جي پچ بابت ڪيل اڻوڻندڙ تبصري سبب مشڪلاتن کي منهن ڏئي رهيو آهي.
عثمان خواجا آءِ سي سي طرفان ”ويـري گڊ“ قرار ڏنل پچ بابت اڻوڻندڙ ٻولي استعمال ڪئي، جنهن تي ڪرڪيٽ آسٽريليا جو موقف آهي ته بيٽر کي عوامي هنڌن تي اهڙي تبصري جي اجازت ناهي.
رپورٽن موجب، ڪرڪيٽ آسٽريليا عثمان خواجا کان پرٿ ٽيسٽ بابت ڪيل تبصري تي وضاحت گهري سگهندي، جيڪا برسبين ٽيسٽ کان اڳ طلب ڪري سگهجي ٿي ۽ ضرورت پوڻ تي ڪرڪيٽر خلاف ضابطا ڀڃڪڙي تحت ڪارروائي به ڪري سگهجي ٿي.
واضح رهي ته عثمان خواجا کي ايشز سيريز جي برسبين ٽيسٽ کان اڳ فٽنيس ٽيسٽ پاس ڪرڻي آهي، پرٿ ٽيسٽ کان اڳ گولف کيڏي چيلهه جي تڪليف جو شڪار ٿيڻ تي کيس سخت تنقيد جو نشانو بڻايو ويو هو، ڇو ته هو پرٿ ٽيسٽ اوپننگ نه ڪري سگهيو هو .
ان کان پوءِ اڳوڻن ڪرڪيٽرن ۽ ماهرن عثمان خواجا کي ڊراپ ڪرڻ جو مطالبو ڪيو هو، پر چار ڊسمبر کان شروع ٿيندڙ ايشز سيريز جي ڊي اينڊ نائيٽ ٽيسٽ اسڪواڊ ۾ عثمان خواجا کي برقرار رکيو ويو آهي.
