اسلام آباد(بيورو رپورٽ) ملڪ ۾ هڪ ڀيرو ٻيهر مهانگائي ۾ اضافي جي رفتار تيزي سان وڌي رهي آهي، تازو هفتي دوران هفتيوار مهانگائي ۾ 0.73 سيڪڙو اضافو ٿيو آهي، جڏهن ته سالياني بنياد تي مهانگائي 4.32 سيڪڙو تائين پهچي وئي آهي. تازو هفتي دوران 14 ضروري شين جون قيمتون وڌيون آهن ۽ 12 شين جي قيمتن ۾ گهٽتائي رڪارڊ ڪئي وئي آهي، جڏهن ته 25 شين جون قيمتون برقرار رهيون آهن.وفاقي اداري شماريات طرفان مهانگائي بابت هفتيوار رپورٽ جاري ڪئي وئي آهي. ڳڻپ کاتي جي رپورٽ مطابق ٽماٽا 28 سيڪڙو، بصر 10 سيڪڙو ۽ پٽاٽو 4.58 سيڪڙو تائين سستا ٿي ويا آهن، جڏهن ته لوڻ، چڻن جي دال۽ اٽو پڻ سستي ٿيندڙ شين ۾ شامل آهن.رپورٽ موجب دال مڱ، گيھه، کاڄرو تيل جون قيمتون وڌيون آهن، جڏهن ته کنڊ، ڳڙ، وڏو گوشت، بجلي، ايل پي جي، سگريٽ ۽ ڪاٺ جون قيمتون به وڌيون آهن. مختلف شهرن ۾ کنڊ 179 کان 220 رپين في ڪلو تائين وڪرو ٿي رهي آهي، جڏهن ته ننڍي طبقي لاءِ بجلي جي اگهه ۾ 11 سيڪڙو کان وڌيڪ اضافو ڪيو ويو آهي. انگن اکرن موجب، تازو هفتي دوران حساس قيمتن جي اشاري جي لحاظ سان، سالياني بنياد تي 17 هزار 732 رپين تائين ماهوار آمدني رکڻ واري طبقي لاءِ مهانگائي ۾ اضافي جي رفتار 0.094 سيڪڙو گهٽتائي سان 3.85 سيڪڙو، 17 هزار 733 کان 22 هزار 888 رپين ماهوار آمدني رکڻ واري طبقي لاءِ مهانگائي ۾ اضافي جي رفتار 0.99 سيڪڙو وڌڻ سان 4.70 سيڪڙو، ۽ 22 هزار 889 کان 29 هزار 517 رپين ماهوار آمدني رکڻ واري طبقي لاءِ مهانگائي ۾ 0.49 سيڪڙو اضافو ٿي، جيڪا 4.60 سيڪڙو رهي. انهي طرح، 29 هزار 518 کان 44 هزار 175 رپين ماهوار آمدني رکڻ واري طبقي لاءِ مهانگائي ۾ 0.28 سيڪڙو اضافو ٿي 4.40 سيڪڙو رهي، ناڻي واري وزارت نومبر ۾ مهانگائي جي شرح 5 کان 6 سيڪڙو تائين رهڻ جو امڪان ظاهر ڪيو آهي ۽ چيو آهي ته خوراڪ جي قيمتن ۽ زرعي پيداوار تي دٻاءُ سبب مهانگائي وڌڻ جو امڪان آهي. ناڻي واري مطابق، پاڪستان جي معاشي صورتحال محتاط طور تي مثبت نظر اچي رهي آهي. سرڪاري انگن اکرن موجب، ڪراچي جا شهري سڀ کان وڌيڪ مهانگِي کنڊ خريد ڪرڻ تي مجبور آهن. شهر قائد ۾ هڪ ڪلو چيني 220 رپين ۾ دستياب آهي. ڪوئيٽا ۾ کنڊ جي وڌ ۾ وڌ قيمت 216 رپيا، حيدرآباد ۾ 215 رپيا، ۽ بنو ۾ شهري هڪ ڪلو چيني 212 رپين ۾ خريدڻ تي مجبور آهن. لاڙڪاڻي ۾ هڪ ڪلو چيني 205 رپين ۾، سکھر ۾ 200 رپين ۾، اسلام آباد ۽ راولپنڊي ۾ چيني جي وڌ ۾ وڌ قيمت 190 رپيا رڪارڊ ڪئي وئي. رپورٽ موجب، گوجرانوالا ۽ سيالڪوٽ ۾ هڪ ڪلو کنڊ 180 رپين ۾، فيصل آباد ۽ سرگوڌا ۾ 180 رپين ۾، ۽ لاهور ۾ 179 رپين ۾ دستياب آهي. ملڪ ۾ اوسطاً چيني جي هڪ ڪلو قيمت 189 رپيا 61 پيسه رڪارڊ ڪئي وئي، جڏهن ته گذريل هفتي چيني جي هڪ ڪلو اوسط قيمت 188 رپيا 81 پيسه هئي.
پهرين ڊسمبر کان تيل اگهن ۾ وڏي لاٿ جو امڪان
اسلام آباد (بيورو) عوام لاءِ خوشخبري آهي ته پيٽروليم شين جي اگهن ۾ پهرين ڊسمبر کان وڏي لاٿ جو امڪان آهي. ذريعن موجب، پيٽرول جي قيمت ۾ اٽڪل 3.75 رپيا في ليٽر ۽ هاءِ اسپيڊ ڊيزل جي اگهه ۾ 6.10 رپيا في ليٽر لاٿ متوقع آهي. اهڙي ريت گاسليٽ جي قيمت ۾ 73 پئسا ۽ لائيٽ ڊيزل آئل جي اگهه ۾ 6.35 رپيا في ليٽر گهٽتائي جو امڪان آهي. ذريعن جو چوڻ آهي ته آئل انڊسٽري پنهنجو ڪم مڪمل ڪري اوگرا ڏانهن تجويزون موڪلي ڇڏي آهي، جنهن کانپوءِ اوگرا انهن بنيادن تي قيمتن ۾ ڦيرڦار واري سمري تيار ڪري رهي آهي، جيڪا سڀاڻي ناڻي واري وزارت ڏانهن موڪلي ويندي. ناڻي واري وزارت ايندڙ پندرهن ڏينهن لاءِ پهرين ڊسمبر کان لاڳو ٿيندڙ نون اگهن جو اعلان 30 نومبر تي ڪندي. ذريعن موجب، نون اگهن جي اعلان کان اڳ وزيراعظم شهباز شريف سان پڻ مشاورت ڪئي ويندي.
وڏين ڪمپنين تي لاڳو سپر ٽيڪس گهٽائڻ تي غور
اسلام آباد (بيورو) اسلام آباد ۾ پاڪستان بزنس ڪائونسل جي هڪ سيمينار ۾ ڳالهائيندي، چيئرمين ايف بي آر راشد محمود لنگڙيال چيو ته وزيراعظم شهباز شريف پگهاردار طبقي تي ٽيڪس جي شرح گهٽائڻ جون هدايتون جاري ڪيون آهن، جنهن تي ايندڙ بجيٽ لاءِ باقاعده ڪم شروع ٿي چڪو آهي. هن چيو ته وڏين ڪمپنين تي لاڳو سپر ٽيڪس کي مرحليوار گهٽائڻ ۽ بعد ۾ ان کي ختم ڪرڻ جو منصوبو پڻ غور هيٺ آهي، ته جيئن سيڙپڪاري جا موقعا وڌائي سگهجن. چيئرمين ايف بي آر موجب، سپر ٽيڪس ۾ ممڪن گهٽتائي بابت آءِ ايم ايف سان به صلاح ڪئي ويندي. هن چيو ته ٽيڪس جي شرح گهٽائڻ جو سڌو سنئون تعلق ٽيڪس ڏيندڙن جي تعداد ۾ واڌ ۽ ٽيڪس جي تعميل کي بهتر بڻائڻ سان آهي، جيترا وڌيڪ ماڻهو ٽيڪس نيٽ ۾ ايندا، اوترو ئي ٽيڪس جو بار گهٽجي سگهي ٿو.
شگر ملون نه هلائڻ خلاف درخواست تي ڪين ڪمشنر ۽ ٻين کي نوٽيس
ڪراچي (رپورٽر)سنڌهاءِ ڪورٽ جي آئيني بينچ جسٽس عدنان اقبال چوڌري تي ٻڌل ٻه رڪني بئنچ ۾ ڪمند جي ڪريشنگ شروع نه ٿيڻ خلاف درخواست جي ٻڌڻي ٿي، عدالت سيڪريٽري زراعت ۽ ڪين ڪمشنر کي طلب ڪري ورتو، عدالت درخواست جي وڌيڪ ٻڌڻي 5 ڊسمبر تائين ملتوي ڪري ڇڏي، درخواست گذار نواب زبير ٽالپر چيو ته کنڊ جي ايڪٽ موجب ڪمند جي ڪريشنگ سيزن 15 نومبر کان شروع ٿئي ٿو، کنڊ جي ايڪٽ تحت شگر ملون 30 نومبر تائين هلائڻيون هيون، درخواستگذارجو چوڻ آهي ته ڪالهه کان شگر ملون بند آهن، کنڊ جون ملون بند ٿيڻ سبب ڪمند سڙي رهيو آهي، ڪمند جو فصل نه ٿيڻ سبب ڪڻڪ جي پوک به نه ٿي سگهي، ڪمند جي آبادگارن جو معاشي قتل عام ڪيو پيو وڃي.
پنجاب ۾ ڪمند جي قيمت طئي ڪندڙ ڳجهو ڳٺ جوڙ وائکو
لاهور (بيورو) پنجاب ۾ گڏيل سازش سان ڪمند جي قيمت مقرر ڪرڻ واري شگر ملز جي ڳجهي اتحاد کي پڪڙيو ويو، مسابقتي ڪميشن شگر ملز جي ڪارٽيل کي پڪڙي ورتو، مسابقتي ڪميشن موجب، پنجاب جي 10 شگر ملز کي ڪارٽيل ٺاهڻ تي شوڪاز نوٽيس جاري ڪيا ويا، ڪميشن جو چوڻ آهي ته شگر ملز گڏيل سازش ذريعي ڪمند جي ڪريشنگ ۾ دير جو فيصلو ڪيو، پڌرائي ۾ چيو ويو آهي ته شگر ملز ڳٺ جوڙ ٺاهڻ بعد ڪمند جي قيمت 400 رپيا في مڻ مقرر ڪئي، جنهن ۾ هارين کي نظرانداز ڪيو ويو، مسابقتي ڪميشن جي پڌرنامي موجب شگر ملز 10 نومبر تي هڪ مل ۾ ڳجهي ملاقات ڪئي، جتي گڏيل فيصلو ڪيو ويو ته ڪريشنگ 28 نومبر کان شروع ڪئي ويندي، مسابقتي ڪميشن 10 شگر ملز کي شوڪاز نوٽيس جاري ڪندي 14 ڏينهن اندر لکت ۾ جواب طلب ڪري ورتو آهي، ڪريشنگ ۾ دير سبب کنڊ جي هٿرادو کوٽ ۽ قيمتن ۾ اضافي جو خدشو آهي. جنهن مل ۾ ڳجهي ملاقات ٿي، ان کي پڻ شوڪاز نوٽيس جاري ڪيو ويو.
