ميرپوربٺورو/ کورواھ (رپورٽ: امتياز علي سومرو/ شاھجھان خاصخيلي) سنڌين نيشنل ڪانگريس مرڪز پاران شروع ڪيل سنڌ بچايو پنڌ مارچ جو مختلف هنڌن تي شاندار اسقبال ڪيو ويو، سنڌين نيشنل ڪانگريس مرڪز پاران چيف آرگنائيزر محب آزاد، ڊپٽي چيف آرگنائيزر سارنگ جويو ۽ آرگنائيزر سهڻي جويو سنڌين نيشنل اسٽوڊنٽس فيڊريشن جي ڊپٽي چيف آرگنائيزر عديل لغاري جي اڳواڻي ۾ سجاول کان نڪتل ”سنڌ بچايو پيادل مارچ“ ميرپور بٺور پھتو جتي پنڌ مارچ جو سياسي سماجي تنظيمن جي اڳواڻن پاران شاندار استقبال ڪيو ويو انهي موقعي تي اڳواڻن خطاب ڪندي چيو ته پيادل لانگ مارچ سنڌ جي بنيادي اهم مسئلن جي حل لاءِ شروع ڪيو ويو آهي جنهن ۾ ڪارپوريٽ فارمنگ جي نالي تي سنڌ جي زمينن تي قبضا ڪرڻ بند ڪريو، آئين ۾ ڪيل 27هين ترميم نامنظور ، سنڌ مان جبري گمشدگين ۽ سياسي ڪارڪنن خلاف ڪوڙن ڪيسن جي خاتمي سميت انڊس ڊيلٽا جي هٿرادو تباهي روڪڻ ۽ ماحولياتي انصاف لاءِ آواز اٿارڻ ۽ ڪلائيمٽ فنڊز ۽ سنڌ جا قدرتي وسيلا سنڌ تي خرچ ڪرڻ جا مطالبا رکيا ويا آهن، ملڪ ۾ وڌندڙ غيريقيني حالتون، عدالتي ڪمزور نظام ۽ مرڪز جي بالادستي سنڌ سميت ٻين صوبن لاءِ شديد ڳڻتي جو سبب بڻيل آهن. هنن وڌيڪ چيو ته صوبن کي برابر آئيني حقن کان محروم ڪرڻ ۽ جوابدهي کان بالاتر رکڻ جون ڪوششون جمهوريت، آئين ۽ صوبائي حقن تي حملو آهن، جڏهن ته مارچ جي کورواھ پهچڻ تي جسقم آريسر ضلعي بدين جي جنرل سيڪريٽري پرويز مڱڻهار،وڪيي ميمڻ ۽ ٻين جي اڳواڻي ۾ ڪارڪنن مارچ جو استقبال ڪري مارچ جي اڳواڻن کي اجرڪون اوڍائي استقبال ڪيو،ان موقعي تي سنڌين نيشنل ڪانگريس جي مرڪزي اڳواڻن ايڊووڪيٽ محب آزاد، سارنگ جويو، عديل لغاري، جسقم آريسر اڳواڻ پرويز مير ۽ ٻين اڳواڻن شهر جي مين سٽي چوڪ تي مارچ کي خطاب ڪندي چيو ته ڪارپوريٽ فارمنگ جي نالي تي سنڌ جي زمينن تي قبضن جون رٿائون جوڙيون ويون آهن، اسان سنڌ جي سرزمين تي قبضو ڪرڻ جي سازش ڪامياب ٿيڻ نه ڏينداسين، اسان سمورين سنڌ دشمن سازشن کي رد ڪريون ٿا ۽ سياسي ڪارڪنن کي کنڀي گم ڪرڻ ۽ سياسي ڪارڪنن مٿان ڪوڙا ڪيس داخل ڪرڻ جي پڻ مذمت ڪريون ٿا، 27هين ترميم جهڙيون ترميمون آڻي سڄي نظام کي جڪڙي عدالتن جي اهميت به ختم ڪئي وئي آهي، هنن چيو ته ماحول دشمن پاليسين کي هٿي ڏئي انڊس ڊيلٽا جي هٿرادو تباهي ڪئي پئي وڃي، دنيا ماحولياتي تحفظ لاءِ پريشان آهي پر سنڌ سان ماحولياتي انصاف نه پيو ڪيو وڃي، جنهن سان انڊس ڊيلٽا تباھ ٿي رهي آهي، اڳواڻن مطالبو ڪندي چيو ته ڪارپوريٽ فارمنگ جي نالي ۾ سنڌ جي زمينن جي نيلامي فوري طور بند ڪئي وڃي، سنڌ مان کنڀي گم ڪيل قومي ڪارڪنن کي آزاد ڪري سياسي ڪارڪنن خلاف ڪوڙا ڪيس داخل ڪرڻ بند ڪيا وڃن ۽ سنڌ ۾ ماحولياتي تحفظ لاءِ وقتائتا قدم کڻي، سنڌ جا وسيلا سنڌ تي خرچ ڪيا وڃن، سجاول کان نڪتل هي چار ڏينهن وارو مارچ ميرپوربٺورو ، کورواھ، ڪڙيو گهنور کان ٿيندو گولاڙچي پهچندو، جتي هڪ وڏي عوامي جلسي سان پڄاڻي تي پهچندو.
