اسلام آباد (م ڊ) فافن جي رپورٽ موجب، ضمني چونڊن ۾ نتيجن جي عمل ۾ شفافيت جي کوٽ ڏٺي وئي. فري اينڊ فيئر اليڪشن نيٽ ورڪ 23 نومبر تي ٿيل ضمني چونڊن بابت پنهنجي تفصيلي رپورٽ جاري ڪري ڇڏي جنهن ۾مجموعي طور تي چونڊ انتظامن کي بهتر قرار ڏنو ويو. رپورٽ موجب، سڄي ملڪ جي 93 سيڪڙو پولنگ بوٿن تي پولنگ جو عمل پرامن ۽ منظم رهيو. فافن جي 122 مبصرن 373 پولنگ اسٽيشنن جو مشاهدو ڪيو جن جي بنياد تي چونڊ عمل جو جائزو پيش ڪيو ويو. رپورٽ ۾ چونڊ مهم جي ڀڃڪڙين ۽ نتيجن ۾ شفافيت جي کوٽ جي نشاندهي به ڪئي وئي. فافن موجب، گهڻو ڪري تڪن ۾ ووٽنگ ٽرن آئوٽ 50 سيڪڙو کان گهٽ رڪارڊ ڪيو ويو. مبصرن اهو به چيو ته 49 سيڪڙو پولنگ اسٽيشنن تي سياسي پارٽين طرفان ووٽرن جي اچ وڃ جي سهولت ڏسڻ ۾ آئي، عورتن، بزرگ شهرين، معذور ووٽرن لاءِ چونڊ انتظامن کي اڻپورو قرار ڏنو ويو. 97 سيڪڙو پولنگ ايجنٽن پولنگ عمل تي اطمينان جو اظهار ڪيو جيڪو مجموعي چونڊ انتظامن لاءِ هاڪاري اشارو آهي. فافن جي رپورٽ ضمني چونڊن ۾ پرامن ماحول جي تصديق سان گڏوگڏ چونڊ سڌارن جي ضرورت تي به زور ڏنو ته جيئن مستقبل ۾ چونڊ عمل وڌيڪ شفاف ۽ اعتماد جوڳو بڻائي سگهجي.
