لاهور (ويب ڊيسڪ) سڄي ملڪ ۾ گرمي جي شدت هوريان هوريان وڌي رهي آهي، ان سلسلي ۾ پي ڊي ايم اي پنجاب اونهاري جي موڪلن بابت تجويز ڏني آهي.
ترجمان موجب، سخت گرميءَ سبب هيٽ ويو جي خطر کي نظر ۾ رکندي پي ڊي ايم اي( پنجاب) طرفان تعليم کاتي، هائرايجوڪيشن ۽ صوبي جي سمورن ڪمشنرن ۽ ڊپٽي ڪمشنرز کي خط لکيو ويو آهي.
پي ڊي ايم اي ڊائريڪٽر
عرفان علي ڪاٺيا طرفان مختلف کاتن ڏانهن موڪليل خط ۾ چيو ويو آهي ته اسڪولن جي وقتن ۾ ڦيرڦار ۽ وڌيڪ گرميءَ جي صورت ۾ اونهاري جون موڪلن جو جلد اعلان ڪيو وڃي.
خط ۾ وڌيڪ چيو ويو آهي ته سخت گرميءَ دوران اسڪولن ۽ ڪاليجن ۾ بنا وقفي جي صاف ۽ ٿڌي پاڻي جي فراهمي يقيني بڻائي وڃي، ٻارن کي واضح هدايتون ڏنيون وڃن ته هلڪا، نرم ڪپڙا پهرن ۽ عارضي طور آئوٽ ڊور سرگرمين تي ترت پابندي مڙهي وڃي.
ان کانسواءِ ڪلاس رومز جي وينٽيليشن، پکن ۽ ڪولنگ سسٽم کي به فعال رکڻ جو چيو ويو آهي.
پي ڊي ايم اي پنهنجي خط ۾ وڌيڪ چيو آهي ته اسڪولن ۾ شروعاتي امداد ڪائونٽر قائم ڪيا وڃن ۽ هيٽ ويو بابت تربيت سکيا ورتل عملو ڊيوٽي تي مقرر ڪيو وڃي، ڊسٽرڪٽ ڊيزاسٽر مئنيجمينٽ اٿارٽيز سان گڏ مسلسل رابطو قائم ڪيو وڃي ته جيئن وقت سر معلومات پهچائي سگهجي.
