اسلام آباد(ويب ڊيسڪ) عالمي مالياتي فنڊ (آءِ ايم ايف) جو وفد نئين قرض بابت ڳالهين لاءِ جلد پاڪستان جو دورو ڪندو.
ذريعن موجب، پاڪستان ۽ آءِ ايم ايف وچ ۾ 1.5 ارب ڊالر جي نئين رعايتي قرض بابت ڳالهيون ٿينديون. نئون قرض پروگرام موسمياتي تبديلين جي نقصانن جي ازالي جي لاءِ هوندو.
ان ڏس ۾ وزير اعظم جي دبئي ۾ ايم ڊي آئي ايم ايف سان تازي ملاقات ۾ ڳالهه ٻولهه ٿي هئي، آءِ ايم ايف جو وفد نئين موسمياتي تبديلي قرض پروگرام تي ڳالهيون ڪندو.
ذريعن جو چوڻ آهي ته پاڪستاني معيشت کي 2 سال اڳ موسمياتي تبديلين سان 30 ارب ڊالر جو نقصان ٿيو هو، آءِ ايم ايف نئين قرض پروگرام ۾ موسمياتي تبديلين جا نقصان گهٽ ڪرڻ ۾ مدد ڪندو، آءِ ايم ايف نئين قرض پروگرام ۾ موسمياتي تبديلي جي قدمن ۽ هدفن جو جائزو وٺندو.
ذريعن موجب، مارچ جي شروع ۾ آءِ ايم ايف جو هڪ وفد پاڪستان ايندو، وفد پاڪستاني اختيارين سان 7 ارب ڊالر جي قرض پروگرام ۾ هڪ ارب ڊالر جي اڳئين قسط بابت ڳالهيون ڪندو.
ذريعن جو چوڻ آهي ته آءِ ايم ايف کي جولاءِ کان ڊسمبر تائين جي معاشي ڪارڪردگي تي آگاهي پڻ ڏني ويندي.
