ممبئي (ويب ڊيسڪ) بالي ووڊ جي شهنشاهه اميتاڀ بچن 2024ع ۾ لاڏاڻو ڪري ويل مشهور ڀارتي شخصيتن کي ياد ڪندي هڪ جذباتي پوسٽ شيئر ڪري ڇڏي.
اميتاڀ بچن انسٽاگرام تي ڪارٽونسٽ ستيه آچاريه جي تخليق ڪيل هڪ تصوير شيئر ڪئي، جنهن ۾ اڳوڻي وزيراعظم ڊاڪٽر منموهن سنگهه، صنعتڪار رتن ٽاٽا، طبلي نواز استاد ذاڪر حسين، ۽ هدايتڪار شيام بينيگل کي ڀيٽا پيش ڪئي وئي آهي.
تصوير ۾ مٿي ڄاڻيل شخصيتون پنهنجي پسنديدا سرگرمين ۾ مصروف نظر اچن ٿيون.
ذاڪر حسين طبلو وڄائي رهيو آهي، شيام بينيگل ڪيمرا جي پويان آهي، رتن ٽاٽا جانورن کي کاڌو ڏئي رهيو آهي، جڏهن ته ڊاڪٽر من موهن سنگهه ملڪ جي تعمير ۾ مصروف آهن.
تصوير جي ڪيپشن ۾ لکيل آهي ته” سال 2024 ۾ هڪ پارسي، مسلمان، سک ۽ هندو جو لاڏاڻو ٿيو ۽ قوم کين صرف ڀارتي طور ياد ڪيو. “
اميتاڀ بچن تصوير شيئر ڪندي ڪيپشن ۾ لکيو ته ” تصوير پاڻ ڳالهائي رهي آهي، مداح اهڙي پوسٽ تي بالي ووڊ شهنشاهه کي ساراهي رهيا آهن.
ياد رهي ته اڳوڻي ڀارتي وزيراعظم ڊاڪٽر من موهن سنگهه 26 ڊسمبر تي دهلي ۾ 92 ورهين جي ڄمار ۾ ديهانت ڪري ويو، شيام بنيگل 23 ڊسمبر تي 90 ورهين جي عمر ۾ پرلوڪ پڌاري ويو، رتن ٽاٽا 10 آڪٽوبر تي 86 ورهين جي ڄمار ۾ لاڏاڻو ڪيو، جڏهن ته استاد ذاڪر حسين ڊسمبر ۾ 73 سالن جي عمر ۾ سان فرانسسڪو ۾ دم ڌڻي حوالي ڪيو.
