ڪراچي (ويب ڊيسڪ) ڪراچي ايئرپورٽ تي جنرل ايوي ايشن ايريا هينگرز ۾ ڪتن جي گهڻائي فلائٽ سيفٽي لاءِ خطرو بڻجي وئي.
ذريعن موجب ڪراچي ايئرپورٽ تي جنرل ايوي ايشن ايريا ۾ رولو ڪتن جي گهڻائي آهي ۽ رولو ڪتا جنرل ايوي ايشن جي ٽيڪسي وي تي آزادي سان گهمي رهيا آهن.
ذريعن جو چوڻ آهي ته ٽيڪسي وي تان گذرندڙ ڪتا جهازن سان ٽڪرائجي سگهن ٿا، ڪتن جو آزاداڻو گشت اڏامن جي فلائٽ سيفٽي لاءِ به خطرو آهي.
ذريعن موجب پاڪستان ايئرپورٽ اٿارٽي رولو ڪتن جي ايئرپورٽ ايريا ۾ آمد روڪڻ ۾ ناڪام آهي، ماضي ۾ رولو ڪتا مرڪزي رن وي تي به گهمندي نظر آيا آهن.
ذريعن جو چوڻ آهي ته جنرل ايوي ايشن ايريا ۾ تربيتي اڏامن جي اچ وڃ مسلسل جاري رهندي آهي، رولو ڪتن جي گهڻائي سبب گذريل شام هڪ رولو ڪتي جهاز سان ٽڪرائجڻ کان بچي ويو، جنرل ايوي ايشن هينگز مان رواني ٿيندڙ اڏام حادثي جي انديشي سبب رد ڪرڻي پئي هئي.
