اسلام آباد (م ڊ) وزيراعظم شهباز شريف جي قيادت ۾ حڪومت آءِ ايم ايف اسٽاف مشن سان اهم ڳالهين لاءِ تياريون شروع ڪري ڇڏيون آهن ۽ هلندڙ هفتي جي آخر ۾ حڪمت عملي کي حتمي شڪل ڏني ويندي، مني بجيٽ جي صورت ۾ 7 تجويزون پيش ڪيون ويون آهن، جن ۾ مشينري، صنعتي خام مال ۽ ڪمرشل خام مال جي امپورٽ تي ايڊوانس انڪم ٽيڪس ۾ هڪ سيڪڙو، سپلائيز، سروسز ۽ معاهدن تي ود هولڊنگ ٽيڪس ۾ هڪ سيڪڙو ۽ مشروبات جي ڊيوٽي ۾ 5 سيڪڙو واڌ جي تجويز ڏني وئي آهي، مختلف شعبن تي ٽيڪس جي شرح ۾ اضافو ٿي سگهي ٿو پر ايف بي آر حڪومت کي اقتصادي سرگرمين ۾ سست رفتاري ۽ مهانگائي جي دٻاءُ کي گهٽائڻ جي آثارن سبب ٽيڪس جي شرح نه وڌائڻ جي سفارش ڪئي آهي، ”حڪومت آئي ايم ايف جي اسٽاف مشن جي سربراهه ناٿن پورٽر جي سربراهي ۾ ايندڙ هفتي جي آخر ۾ ڳالهين لاءِ پنهنجي حڪمت عملي کي مضبوط ڪرڻ واري آهي، جيڪو 11 نومبر کان 15 نومبر 2024 تائين اسلام آباد جو دورو ڪرڻ وارو آهي، ان حوالي سان اعليٰ آفيسرن تصديق ڪئي ته پاڪستاني اختيارين وٽ ٻه آپشن آهن هڪ ته مني بجيٽ پيش ڪجي يا وري خرچ گهٽائجن، ته جيئن مالي خسارو ۽ بنيادي توازن جا هدف ماڻي سگهجن، ايف بي آر کي هلندڙ مالي سال جي پهرين 4 مهينن ۾ 189 ارب رپين جي روينيو شارٽ فال کي منهن ڏيڻو پيو، جيڪو هلندڙ مالي سال جي پهرين اڌ ۾ 321 ارب رپين تائين پهچڻ جو اندازو لڳايو ويو آهي، ايف بي آر جو خيال آهي ته حڪومت IMF کي 12,913 ارب رپين جي روينيو هدف کي گهٽائڻ لاءِ راضي ڪرڻ جي ڪوشش ڪري جنهن تي آءِ ايم ايف سان اتفاق ڪيو ويو هو، جڏهن ته نامياتي تبديلين ۽ ٻين عنصرن جهڙوڪ وڏين صنعتن جي واڌ ۽ درآمد ۾ گهٽتائي ايف بي آر جي ٽارگيٽ ۾ گهٽتائي جي حمايت نه ڪري سگهي ٿي.
