ڪراچي (ويب ڊيسڪ) تحريڪ انصاف سپريم ڪورٽ پريڪٽس اينڊ پروسيجر ايڪٽ ۾ آرڊيننس ذريعي ترميم خلاف سنڌ هاءِ ڪورٽ سان رابطو ڪري ورتو.
درخواست ۾ وفاق، ڪابينا سيڪريٽري ۽ پارلياماني معاملن جي سيڪريٽري کي ڌر بڻايو ويو آهي.
درخواست ۾ موقف اختيار ڪيو ويو ته چيف جسٽس قاضي فائز عيسيٰ پنهنجي فيصلي ۾ آرڊيننس لاءِ 3 شرط طئي ڪيا هئا، هن وقت ملڪ ۾ ڪا آفت آهي نه ڪا ايمرجنسي، پارليامينٽ جي موجودگي باوجود آرڊيننس آڻڻ غير آئيني آهي.
درخواست ۾ چيو ويو آهي ته پريڪٽس اينڊ پروسيجر ايڪٽ ۾ ترميم بابت فيصلي ۾ چيف جسٽس ڪميٽي جي قيام جي تائيد ڪئي هئي، چيف جسٽس لکيو ته ماسٽر آف دي روسٽرم جو ڪردار ختم ڪرڻو آهي، سپريم ڪورٽ جي فيصلي جي موجودگي ۾ آرڊيننس ذريعي ترميم نٿي ڪري سگهجي.
درخواست ۾ موقف اختيار ڪيو ويو آهي ته ترميم لاءِ آرڊيننس بدران پارليامينٽ ۾ بحث کانپوءِ منظوري ٿيڻ گهرجي ها، سپريم ڪورٽ کي پنهنجا معاملا پاڻ طئي ڪرڻا آهن، حڪومت جي مداخلت سان عدليا جي آزادي ختم ٿي ويندي.
