پاڻ کي تبديل ڪرڻ انسان لاءِ وڏو ڏکيو هوندو آهي پر هڪ عادت مائڪرو سافٽ جي شريڪ باني بل گيٽس کي تبديل ٿيڻ ۾ اهم ڪردار ادا ڪيو.
حقيقت ۾ ان عادت بل گيٽس کي ڪمپيوٽر ۽ سافٽ ويئر جي محدود دائري مان ڪڍي عالمي سطح تي فلاحي ڪمن لاءِ تيار ڪيو.
68 ورهين جي بل گيٽس تازو پنهنجي گفتگو ۾ ٻڌايو ته 18 کان 40 ورهين جي عمر تائين مان پنهنجي ڪم بابت گهڻو جنوني هيس ۽ مائڪرو سافٽ ڪمپني ئي منهنجي لاءِ سڀ ڪجهه هئي.
هن چيو مان خوش قسمت آهيان ته ٻين ماڻهن مائڪرو سافٽ کي سنڀالي ورتو ۽ مون کي سڄي دنيا جي طبي مسئلن بابت پڙهڻ ۽ ڄاڻڻ جو موقعو مليو.
دنيا جي امير ترين ماڻهن ۾ شامل ٿيندڙ بل گيٽس کي مطالعو ڪرڻ پسند آهي ۽ ان عادت ئي کيس پنهنجو ڪيريئر تبديل ڪرڻ ۾ مدد فراهم ڪئي.
1997 ۾ بل گيٽس ۽ ان وقت سندس گهرواري ملينڊا هڪ مضمون پڙهيو، جنهن ۾ ٻڌايو ويو هو ته دنيا ۾ هر سال لکين ٻار اهڙن مرضن سبب لاڏاڻو ڪري ويندا آهن، جن جو علاج آساني سان ممڪن آهي.
جڏهن هو 2000 ۾ مائڪرو سافٽ جي چيف ايگزيڪيوٽو جي عهدي کان الڳ ٿيو ته کيس وڌيڪ مطالعو ڪرڻ جو موقعو مليو ۽ هن عالمي طبي بحران بابت تحقيق ڪري بل اينڊ ملينڊا گيٽس فائونڊيشن جو بنياد رکڻ جو فيصلو ڪيو.
هن ان اداري کي پنهنجي ڌيان جو مرڪز بڻائي ڇڏيو ۽ مطالعي جي عادت کيس طبي مسئلن جو تجزيو ڪري انهن شعبن جي سڃاڻپ ڪرڻ ۾ مدد ڪئي، جنهن ۾ پئسو لڳائي هو ماڻهن جي مدد ڪري پئي سگهيو.
2017 ۾ هڪ انٽرويو دوران بل گيٽس چيو هو ته مطالعي سان دنيا بابت ڄاڻڻ جو تجسس وڌيو آهي ۽ ان سان ئي کيس ڪيريئر ۽ گيٽس فائونڊيشن کي اڳتي وڌائڻ ۾ مدد ملي.
2000 کان هيل تائين سندس ادارو طبي مسئلن جهڙو ايڊز، مليريا وغيرا جي روڪٿام لاءِ 53.8 ارب ڊالر خرچ ڪري چڪو آهي.
