اسلام آباد (ويب ڊيسڪ) غير قانوني پرڏيهين کي واپس وڃڻ جي ڊيڊ لائن کانپوءِ افغان شهرين کي پاڪستان مان واپس پنهنجي ڏيهه موڪلڻ جو سلسلو جاري آهي.
پاڪستان ۾ غير قانوني طور رهندڙ افغانين جي عزت سان ۽ محفوظ طريقي سان واپسي حڪومت جي پهرين ترجيح آهي ۽ روز جي بنيادن تي هزارن جي انگ ۾ غير رجسٽرڊ افغان شهرين کي طورخم ۽ چمن بارڊر ذريعي پنهنجي ملڪ موڪليو پيو وڃي.
تفصيلن موجب 7 نومبر تي 5085 غير قانوني افغانين کي پنهنجي ملڪ واپس موڪليو ويو، جن ۾ 1475 مرد، 1420 عورتون ۽ 2190 ٻار شامل آهن.
افغان روانگي لاءِ 231 گاڏين ۾ 829 خاندانن جي پنهنجي وطن واپسي عمل ۾ آندي وئي.
انگن اکرن موجب هيل تائين مجموعي طور تي ٻه لک 3 هزار 639 غير قانوني طور رهندڙ افغانين جي پنهنجي ملڪ واپسي ٿي چڪي آهي.
