ابوظهبي/اسلام آباد(ويب ڊيسڪ)پاڪستان، سعودي عرب، ترڪي، گڏيل عرب امارات، قطر، اردن، انڊونيشيا ۽ مصر اسرائيل جي والاريل فلسطيني علائقن ۾ غيرقانوني آبادڪاري جي پاليسي جي سخت مذمت ڪندي اوڀر يروشلم ۾ E1 آبادڪاري منصوبي کي فوري طور روڪڻ ۽ ان تحت کنيل سمورا قدم واپس وٺڻ جو مطالبو ڪيو آهي.
اٺن ئي ملڪن جي پرڏيهي وزيرن گڏيل بيان ۾ چيو آهي ته E1 منصوبو فلسطيني علائقن جي جاگرافيائي ڳانڍاپي کي سخت متاثر ڪندو، خاص طور اولهه ڪناري ۽ اوڀر يروشلم وچ ۾ رابطي کي نقصان پهچائيندو، جنهن سان 1967ع جي سرحدن جي بنياد تي آزاد ۽ پاڻ ۾ ڳنڍيل فلسطيني رياست جي قيام جون راهون وڌيڪ ڏکيون ٿينديون.
گڏيل بيان ۾ اسرائيلي قبضي هيٺ آبادڪارن طرفان فلسطيني عوام ۽ سندن ملڪيتن خلاف ٿيندڙ تشدد ۽ ڀڃڪڙين جي پڻ مذمت ڪئي وئي ۽ چيو ويو ته اهڙا قدم عالمي قانون ۽ گڏيل قومن جي لاڳاپيل قراردادن جي ڀڃڪڙي آهن، جيڪي علائقائي ۽ عالمي امن لاءِ سنگين خطرو بڻجي رهيا آهن.
پرڏيهي وزيرن خبردار ڪيو ته E1 منصوبو اسرائيلي آبادڪاري کي وڌائڻ ۽ والاريل فلسطيني علائقن کي ضم ڪرڻ جي عمل کي اڳتي وڌائيندو، جنهن سان فلسطيني رياست جي قيام جون امڪان وڌيڪ ڪمزور ٿيندا.
بيان ۾ چيو ويو آهي ته اهڙيون ڪارروايون امن لاءِ جاري عالمي ڪوششن کي سڌو چئلينج ڪن ٿيون، جن ۾ آمريڪي صدر ڊونلڊ ٽرمپ جو امن منصوبو پڻ شامل آهي، جنهن ۾ والاريل علائقن کي ضم ڪرڻ ۽ فلسطينين کي زبردستي لڏائڻ کي رد ڪيو ويو آهي.
اٺن ملڪن جي پرڏيهي وزيرن ان ڳالهه تي پڻ زور ڏنو ته عالمي قانون ۽ گڏيل قومن جي قراردادن موجب ٻن رياستن وارو حل ئي منصفاڻي، جامع ۽ ڊگهي مدي واري امن لاءِ واحد قابلِ عمل رستو آهي.
هنن چيو ته غيرقانوني آبادڪاري جي ذميوار ادارن ۽ ماڻهن خلاف مناسب عالمي قدم ۽ پابنديون لاڳو ٿيڻ گهرجن، جڏهن ته آبادڪاري ۽ والارڻ جي پاليسين جي مدد يا سهولت فراهم ڪندڙ ڌرين خلاف پڻ ڪارروائي ڪئي وڃي.
گڏيل بيان ۾ عالمي برادري کان مطالبو ڪيو ويو ته غيرقانوني آبادڪاري جي قيام، واڌ ۽ ان کي مستقل بڻائڻ ۾ مدد ڏيندڙ هر قسم جو سهڪار ۽ مالي مدد روڪي وڃي.
پرڏيهي وزيرن گڏيل قومن جي سلامتي ڪائونسل، لاڳاپيل ملڪن ۽ عالمي ادارن تي زور ڏنو ته هو عالمي قانون تحت پنهنجون ذميواريون پوريون ڪن ۽ فلسطيني عوام جي تحفظ، غيرقانوني آبادڪاري جي روڪٿام ۽ فلسطيني عوام جي خود اراديت واري حق جي دفاع لاءِ فوري ۽ اثرائتا قدم کڻن.
