ڪيليفورنيا (ويب ڊيسڪ) ايپل پنهنجي آءِ فون واهپيدارن لاءِ نئون آپريٽنگ سسٽم آئي او ايس 27 متعارف ڪرائي ڇڏيو آهي، جنهن ۾ ڪيترائي نوان فيچر شامل ڪيا ويا آهن.
رپورٽ موجب ايپل پنهنجي سالياني ڊبليو ڊبليو ڊي سي 2026 تقريب دوران آئي او ايس 27 بابت تفصيل جاري ڪيا. نئين آپريٽنگ سسٽم ۾ آرٽيفيشل انٽيليجنس (اي آءِ) تي ٻڌل اپگريڊ ٿيل سيري سميت ڪيترائي نوان فيچر شامل آهن، جڏهن ته عام واهپيدارن لاءِ ان جي دستيابي جو امڪان سيپٽمبر ۾ آهي.
پرڏيهي خابرو اداري جي رپورٽ موجب آئي او ايس 27 ۾ موجود اي آءِ فيچرز رڳو iPhone 15 Pro، iPhone 15 Pro Max، iPhone 16 Series، iPhone 16e، iPhone 17e، iPhone Air ۽ iPhone 17 Series تائين محدود هوندا.
رپورٽ موجب نئون آپريٽنگ سسٽم iPhone 11 ۽ ان کانپوءِ وارن ماڊلز لاءِ دستياب هوندو، جڏهن ته 2018ع يا ان کان اڳ وارن آءِ فونز کي هي اپڊيٽ نه ملندي. يعني آءِ فون 11، 12، 13، 14، 15، 16 ۽ 17 سيريز جا فون آئي او ايس 27 هلائي سگهندا. ان کانسواءِ iPhone SE (2nd generation) يا ان کانپوءِ جا ايس اي ماڊل به هن نئين آپريٽنگ سسٽم ۾ اپگريڊ ڪري سگهبا.
