ڪينبرا (ويب ڊيسڪ) جڳ مشهور گلوڪارا ڪيٽي پيري هڪ نئين تڪرار جي ور چڙهي وئي، آسٽريلوي اداڪارا روبي روز جي مٿس سنگين الزامن کانپوءِ پوليس جاچ شروع ڪري ڇڏي آهي.
ميڊيا رپورٽن موجب روبي روز سوشل ميڊيا پليٽ فارم تي پوسٽن ۾ دعويٰ ڪئي آهي ته ڪيترائي سال اڳ ميلبورن جي هڪ نائيٽ ڪلب ۾ مون سان نامناسب رويو اختيار ڪيو ويو، مان ان واقعي تي وڏي عرصي کان چُپ رهيس پر هاڻ ان بابت ڳالهائڻ جو فيصلو ڪيو آهي.
هن چيو ته مان پنهنجون سموريون رپورٽون مڪمل ڪري چڪي آهيان ۽ هاڻ پوليس جي هدايت موجب ان معاملي تي وڌيڪ عوامي گفتگو نٿي ڪري سگهان.
آسٽريلوي پوليس تصديق ڪئي آهي ته ان مبينا واقعي جي جاچ جاري آهي، ميلبورن جي جنسي هراساني بابت انويسٽيگيشن ٽيم جاچ ڪري رهي آهي، اهو واقعو مبينا طور 2010 ۾ پيش آيو.
هوڏانهن ڪيٽي پيري جي ٽيم اهڙن الزامن کي رد ڪندي چيو آهي ته روبي روز ماضي ۾ به مختلف شخصيتن تي سنگين الزام هنيا، جيڪي لاڳاپيل ماڻهن رد ڪيا.
