اسلام آباد(ويب ڊيسڪ) اڳوڻي وزيرِاعظم ۽ پاڪستان تحريڪِ انصاف( پي ٽي آءِ ) جي باني عمران خان جي اسپتال منتقلي ۽ ذاتي ڊاڪٽرن تائين پهچ بابت اهم اندروني تفصيل سامهون اچي ويا.
پارٽي ذريعن موجب، بئريسٽر گوهر، عليما خان سان رابطو ڪيو ۽ 14 فيبروري تي چيو ته ٻن ڊاڪٽرن جا نالا ڏئي ڇڏيو ته جيئن کين جيل موڪلي سگهجي، جڏهن ته عليما خان ڊاڪٽرن کي جيل موڪلڻ جي مخالفت ڪئي ۽ عمران خان کي اسپتال منتقل ڪرڻ تي زور ڏنو.
ذريعن جو چوڻ آهي ته عليما خان پاڪستان تحريڪِ انصاف جي ڌرڻن دوران سمورن معاملن کان آگاهه هئي ۽ مرڪزي قيادت سان لاڳيتو رابطي ۾ رهي، ان کانپوءِ ٻيهر رابطي دوران بئريسٽر گوهر کين ٻڌايو ته حڪومت عمران خان کي اسپتال منتقل ڪرڻ تي راضي آهي.
پارٽي ذريعن موجب، عليما خان عمران خان جي اسپتال منتقلي لاءِ قاسم زمان تي اعتراض واريو ۽ لاڳيتو ڊاڪٽر نوشيروان برڪي جي نالي تي اصرار ڪندي رهي، جڏهن ته ان معاملي تي هڪ ڪانفرنس ڪال پڻ ڪئي وئي جنهن ۾ پي ٽي آءِ جي مرڪزي قيادت به شامل هئي.
ذريعن جو چوڻ آهي ته پارلياماني پارٽي ان ڳالهه تي متفق هئي ته عليما خان جي طريقيڪار سبب عمران خان اسپتال منتقل نه ٿي سگهيو.
ٻئي پاسي قومي اسيمبليءَ جي اسپيڪر اياز صادق ۽ گهرو وزير محسن نقوي لاڳيتو پي ٽي آءِ قيادت سان رابطي ۾ رهيا، جڏهن ته خيبرپختونخوا جو وڏو وزير سهيل آفريدي عمران خان جي علاج بابت ذاتي طور لاڳاپيل ادارن سان رابطي ۾ هو.
