تهران(م ڊ) ايران جي نائب پرڏيهي وزير ماجد تخت روانچي چيو آهي ته جيڪڏهن آمريڪا پابنديون هٽائڻ تي ڳالهين لاءِ تيار آهي، ته ايران ايٽمي معاهدي تائين پهچڻ لاءِ ڪجهه سمجهوتن تي غور ڪري سگهي ٿو. برطانوي براڊڪاسٽنگ ڪارپوريشن سان هڪ انٽرويو ۾، هن چيو ته ايران پنهنجي ايٽمي پروگرام تي ڪجهه پابنديون قبول ڪرڻ جي بدلي ۾ اقتصادي پابنديون هٽائڻ چاهي ٿو، پر پنهنجي ميزائل پروگرام يا ٻين معاملن کي ايٽمي ڳالهين سان ڳنڍڻ جي مخالفت ڪري ٿو. هن تصديق ڪئي ته آمريڪا ۽ ايران جي وچ ۾ ايٽمي ڳالهين جو ٻيو دور اڱاري تي جنيوا ۾ منعقد ٿيندو. ان کان اڳ، ٻنهي ملڪن جي وچ ۾ عمان ۾ اڻ سڌي طرح ڳالهيون ٿيون، جن ۾ عماني عملدارن ٽياڪڙي جو ڪردار ادا ڪيو.
