چين جي مشهور نيو انرجي وهيڪل (اين اي وي) تيار ڪندڙ ڪمپني بي واءِ ڊي جي ڀائيواري سان ميگا موٽر ڪمپني (ايم ايم سي) پاڪستان ۾ ٻه نيون اليڪٽرڪ اسپورٽس يوٽيليٽي گاڏيون (ايس يو وي) متعارف ڪرائي ڇڏيون.
اهي گاڏيون بي واءِ ڊي سي لائن 7 ۽ بي واءِ ڊي اٽو 2 جي نالي سان لاهور ۾ هڪ ڊيلرشپ تقريب دوران پيش ڪيون ويون.
تقريب کي خطاب ڪندي بي واءِ ڊي پاڪستان جي ڪنٽري هيڊ لي جيان چيو ته اها اڳڀرائي پاڪستان جي آٽوموٽيو شعبي کي جديد عالمي ٽيڪنالاجي ۽ جدت کان هم آهنگ ڪرڻ جي عزم جي عڪاسي ڪري ٿي.
هن چيو ته بي واءِ ڊي مقامي واهپيدارن کي عالمي معيار جي اليڪٽرڪ گاڏيون فراهم ڪرڻ لاءِ پرعزم آهي.
بي واءِ ڊي پاڪستان ايم ايم سي جي سيلز اينڊ اسٽريٽجي بابت وائس پريزيڊنٽ دانش خالق چيو ته پاڪستان ۾ مستقبل جي موبيليٽي روشن، اليڪٽرڪ ۽ ڊگهي مدي جي بنياد تي هلي رهي آهي، جنهن تي اسان کي خوشي آهي.
پائيدار ٽرانسپورٽ کي هٿي ڏيڻ لاءِ بي واءِ ڊي ايم ايم سي، حبڪو گرين جي ڀائيواري سان پاڪستان جو پهريون سڄي ملڪ جو نيو انرجي وهيڪل چارجنگ ڪوريڊور قائم ڪري رهي آهي، جيڪو تقريبن 1300 ڪلو ميٽرن تي ٻڌل آهي.
اهو چارجنگ ڪوريڊور ڪراچي کان پشاور تائين پکڙيل هوندو ۽ اهم شهرن ۽ موٽر ويز جو احاطو ڪندو.
