اسلام آباد (عوامي آواز رپورٽ) تجزئي نگار نجم سيٺي خانگي ٽي وي پروگرام ۾ ڳالهائيندي چيو آهي ته حڪومت ۽ قانون واري وزارت جي ڪوتاهين جي ڪري چيف آف ڊفينس فورسز (سي ڊي ايف) جو نوٽيفڪيشن دير سان جاري ڪيو پيو وڃي. ذريعن موجب، هي معاملو آرمي چيف يا فيلڊ مارشل جي اختيارن سان لاڳاپيل ناهي پر رڳو سي ڊي ايف جي قانوني رخن سان لاڳاپيل آهي. آرمي چيف اختيار برقرار رکندو ۽ ايڪسٽينشن جو فيصلو بعد ۾ ڪيو ويندو. آرمي ايڪٽ ۾ ترميم ڪئي وئي آهي، پر هوائي فوج ۽ بحريه جي قانونن ۾ ضروري ترميمون نه ٿي سگهيون، جنهن جي ڪري سي ڊي ايف جي ڪمانڊ ۾ انهن فورسز جي پوزيشن تي قانوني سوال اٿاريا پيا وڃن. انهن نقطن تي اڳ ۾ غور ڪيو وڃي ها، جنهن جي ڪري نوٽيفڪيشن 28 نومبر تائين جاري نه ٿي سگهيو ۽ غير ضروري بحث شروع ٿي ويو. حڪومت کي ان جي لاپرواهي تي به تنقيد جو نشانو بڻايو پيو وڃي، جڏهن ته قانون واري وزارت تي سوال اٿاريا پيا وڃن ته انهن نقطن تي اڳ ۾ ڇو غور نه ڪيو ويو. اڳوڻي چيئرمين جوائنٽ چيفس آف اسٽاف ڪميٽي کان پوءِ هڪ نئون سيڪريٽريٽ ۽ پاليسي فورم قائم ڪيو ويندو، جڏهن ته فيلڊ مارشل عاصم منير وزيراعظم جي منظوري سان مستقبل ۾ وائيس چيف ۽ نيشنل ڪمانڊ اٿارٽي جي مقرري لاءِ سفارشون پيش ڪندو. سرڪاري ذريعن جو چوڻ آهي ته سڀئي قانوني سڌارا هڪ يا ٻن ڏينهن ۾ مڪمل ڪيا ويندا ۽ سي ڊي ايف سميت سڀئي نوٽيفڪيشن جلد جاري ڪيا ويندا.
