ليڊز (ويب ڊيسڪ) 74 ورهين جي عورت ڪرسٽين هيڪوڪس ۽ 34 سالن مسلمان نوجوان حمزا دريدي جي محبت ۽ شادي جي انوکي ڪهاڻي هڪ ڀيرو ٻيهر اِهو ثابت ٿيو آهي ته محبت ۾ عمر، مذهب، رنگ ۽ سماجي اصولن جي ڪا حد ناهي ڏسندي.
ان انوکي محبت جي ڪهاڻي جي شروعات 2018ع ۾ ٿي، جڏهن ڪرسٽين فيسبڪ تي انگريزي سيکارڻ لاءِ اشتهار شايع ڪيو. حمزا جنهن کي انگريزي ٻولي سکڻ ۾ دلچسپي هئي، اشتهار ذريعي ڪرسٽين سان رابطو ڪيو، پر جلدي اِهو آن لائين ڪلاس ڊگهي گفتگو ۽ پوءِ محبت ۾ بدلجي ويو.
ميڊيا رپورٽن موجب، آن لائين ڪلاسز جي ڇهه هفتن دوران ئي حمزا ۽ ڪرسٽين هڪٻئي جي محبت ۾ گرفتار ٿي ويا، ان کانپوءِ ڪرسٽين تيونس جو هڪ مختصر دورو ڪيو، انهيءَ دوري دوران ئي ڪرسٽين هميشه لاءِ تيونس ۾ رهڻ جو پهه ڪري ورتو.
رپورٽن ۾ ڄاڻايو ويو آهي ته جوڙي ڊسمبر 2020ع ۾ شادي ڪئي ۽ ٻئي تيونس ۾ رهن ٿا، جڏهن ته ڪرسٽين 2021 ۾ اسلام قبول ڪري چڪي آهي.
حمزا پنهنجي زال بابت چوڻ آهي ته ”ڪرسٽين هڪ بهترين زال آهي، هو منهنجي راڻي آهي، مان سندس شخصيت ۽ ذهانت کي پسند ڪريان ٿو.“
رپورٽن موجب، ڪرسٽين پهرين شادي 2003 ۾ طلاق تي ختم ٿي هئي ۽ پهرين شادي مان هن کي ٻن ٻارن جو اولاد آهي.
