ڪراچي (رپورٽر) سنڌ جي گادي واري شهر ڪراچي ۾ ڊينگي ۽ مليريا جهڙين خطرناڪ بيمارين جي روڪٿام لاءِ اسپري لاءِ صرف 8 ملازم رکيل آهن، جن کي به 8 مهينن کان پگهارون ناهن مليون. شهر جي اڍائي کان ٽي ڪروڙ آبادي لاءِ صرف 18 اسپري ملازم مقرر آهن ذريعن مطابق ڊينگي ڪنٽرول پروگرام100 کان وڌيڪ آساميون خالي پيل آهن،جڏهن ته موجوده عملي کي گذريل 8 سالن کان پڪو به نه ڪيو ويو آهي. رپورٽ موجب، 2021 ۾ پروگرام جي هيڊ آفيس ڪراچي مان حيدرآباد منتقل ڪرڻ کان پوءِ ڪراچي ۾ اسپري مهم لڳ ڀڳ غير فعال ٿي وئي آهي. هن وقت هر ضلعي ۾ رڳو 2 يا 3 ملازم موجود آهن، جيڪي ناڪافي آهن. متاثر ملازمن جو چوڻ آهي ته سياستدانن جي اثر رسوخ وارن آفيسرن جي گهرن تي باقاعده اسپري ٿئي ٿو، جڏهن ته عام شهرين کي بي يار و مددگار ڇڏيو ويو آهي. ٻئي پاسي ويڪٽر بون ڊائزيز پروگرام لاءِ 2024-25 جي بجيٽ ۾ 67.349 ملين رپيا رکيا ويا آهن، جنهن مان 16.66 ملين رپيا اسپري ۽ 14.5 ملين رپيا دوائن لاءِ مخصوص ڪيا ويا آهن، ان باوجود، شهر جي ڪنهن به ضلعي ۾ اسپري شروع نه ٿي سگهي آهي. ڊاڪٽرن موجب چوماسي برساتن کان پوءِ خاص طور تي سيپٽمبر کان ڊسمبر تائين ڊينگي ۽ مليريا جا ڪيس تيزي سان وڌن ٿا. ملازمن جو مطالبو آهي ته اسپري مهم کي فوري طور تي بحال ڪيو وڃي، خالي جايون ڀريون وڃن ۽ سندن پگهارون جاري ڪيون وڃن.
