احمد آباد (ويب ڊيسڪ) ڀارتي رياست گجرات ۾ هڪ عورت ريڙهي واري کان 2 گول گپا گهٽ ملڻ تي روڊ تي ڌرڻو هڻي ويهي ، جنهن سبب ڪلاڪن تائين ٽريفڪ جام ٿي ويئي.
پرڏيهي ميڊيا موجب، اِهو انوکو واقعو شهر ودودرا ۾ پيش آيو، جتي هڪ عورت کي 20 رپين ۾ 6 بدران 4 گول گپا ملڻ تي پٽڪو شروع ڪري ڏنو، عورت جي روئڻ ۽ روڊ تي ويهڻ سبب ڪيئي ڪلاڪن تائين ٽريفڪ معطل ٿي وئي.
وائرل وڊيو ۾ ڏسي سگهجي ٿو ته عورت روڊ تي ويٺي آهي ۽ سڏڪا ڀري روئي رهي آهي ۽ چئي ته ” ريڙڪي وارو هر دفعي ائين ڪري ٿو، اڄ به مونکي 6 جي بدران 4 گول گپا ڏنا اٿائين.“
ان دوران روڊ تان گذرندڙ ماڻهو ۽ موٽر سائيڪل سوار ان منظر کي موبائل ۾ قيد ڪرڻ لڳا، ٿوري ئي دير ۾ هڪ وڏو هجوم گڏ ٿي ويو.
ٽريفڪ جام ٿيڻ تي پوليس کي طلب ڪيو ويو، جتي عورت پوليس کان مطالبو ڪيو ته ريڙهي وارو کيس وڌيڪ 2 گول گپا ڏئي.
بهرحال پوليس عورت کي روڊ تان هٽائڻ ۾ ڪامياب ٿي ۽ ڪلاڪن کان معطل ٽريفڪ بحال ڪئي وئي، پر اهو واضح نه ٿي سگهيو ته عورت جو ٻن گول گپن وارو مطالبو پورو ٿيو يا نه.
