واشنگٽن (م ڊ) آمريڪي صدر ڊونلڊ ٽرمپ چيو آهي ته قطر آمريڪا جو مضبوط اتحادي آهي ۽ ان سان خاص لاڳاپا قائم آهن، تنهن ڪري اسرائيل کي ڪارروائين ۾ تمام گهڻو احتياط ڪرڻو پوندو. صحافين سان ڳالهائيندي صدر ٽرمپ چيو ته قطر جو امير شيخ تميم بن حمد الثاني هڪ عظيم اڳواڻ آهي. اسرائيلي حملن ۽ وزيراعظم نيتن ياهو بابت سوال تي ٽرمپ وضاحت ڪئي ته حماس خلاف قدم کڻڻو پوندو، پر ساڳي وقت قطر کي نظرانداز نه ٿو ڪري سگهجي. هن چيو ته ڪيترن کي خبر ئي ناهي ته قطر آمريڪا جو ڪيترو ويجهو اتحادي آهي.
-
حماس قيادت جتي به هوندي، نشانو بڻبي: نيتن ياهو
تل ابيب (م ڊ) اسرائيلي وزيراعظم نيتن ياهو حماس اڳواڻن خلاف وڌيڪ حملن جي ڌمڪي ڏئي ڇڏي آهي. آمريڪي پرڏيهي وزير مارڪو روبيو سان گڏ پريس ڪانفرنس ۾ نيتن ياهو دوحا ۾ حماس قيادت تي حملي جي ذميواري قبول ڪئي ۽ چيو ته حماس اڳواڻ جتي به هجن، نشانو بڻائي سگهجن ٿا. هن واضع ڪيو ته آمريڪا سان گڏجي مڪمل طاقت سان ڪارروايون جاري رهنديون. مارڪو روبيو اسرائيل کي آمريڪا جو بهترين اتحادي قرار ڏيندي چيو ته دهشتگردي خلاف جنگ ۾ آمريڪا اسرائيل سان گڏ آهي ۽ حماس کي هٿياربند گروهه طور ختم ٿيڻ گهرجي. آمريڪي ميڊيا موجب مارڪو روبيو سڀاڻي قطر جو دورو ڪندو.
