پشاور (ويب ڊيسڪ) خيبر پختونخوا ۾ ٻوڏ متاثرن لاءِ فنڊ گڏ ڪرڻ لاءِ سان پشاور ۾ نمائشي ميچ ڪرائي وئي.
پشاور جي عمران خان ڪرڪيٽ اسٽيڊيم ۾ کيڏيل ميچ ۾ پشاور زلمي ليجنڊز اليون کي 6 رنسن تان شڪست ڏئي ڇڏي. پشاور زلمي طرفان ڏنل 145 رنسن جي هدف جي جواب ۾ ليجنڊز اليوَن جي ٽيم 138 رنسون ٺاهي سگهي.
بابر اعظم جي قيادت ۾ کيڏندڙ زلمي جي ٽيم پهرين بيٽنگ ڪندي 144 رنسن تي آل آئوٽ ٿي وئي. بابر اعظم شاندار 41 رنسن جي اننگز کيڏي، ياسر حميد 35 ۽ عامر برڪي 24 رنسون ٺاهي نمايان رهيا.
ليجنڊز اليوَن طرفان شاهد آفريدي ۽ عبدالرزاق 3،3 وڪيٽون ورتيون، جڏهن ته محمد حفيظ ۽ سعيد اجمل 2،2 شڪار ڪيا.
هدف پٺيان ڊوڙندي ليجنڊز اليون مقرر 15 اوورن ۾ 6 وڪيٽن جي نقصان تي 138 رنسون ٺاهي سگهي ۽ ڇهن رنسن تان ميچ هارائي وئي. ڪپتان انضمام الحق 46 ۽ اظهر محمود 34 رنسون ٺاهيون.
پشاور زلمي جي محمد عرفان ۽ بابر اعظم 2،2 وڪيٽون ورتيون، جڏهن ته سلمان خان ۽ ذوالفقار بابر جي حصي ۾ هڪ، هڪ وڪيٽ آئي.
واضح رهي ته پشاور زلمي، ڊائريڪٽوريٽ جنرل آف اسپورٽس خيبر پختونخوا ۽ خيبر پختونخوا حڪومت جي سهڪار سان ٿيل ميچ مان حاصل ٿيندڙ آمدني ٻوڏ متاثرن ۾ ورهائي ويندي، ميچ ۾ شرڪت ڪندڙ رانديگرن ميچ فيس وٺڻ کان به انڪار ڪري ڇڏيو.
