اسلام آباد(م ڊ)وفاقي وزير احسن اقبال چيو آهي ته مون کي 18هين ترميم سان ڪو به اختلاف ناهي،ارڙهين ترميم تي ان جي روح مطابق اڃا تائين مڪمل عملدرآمد ناهي ٿيو،هڪ ٽوئيٽ ۾ هن چيو ته وفاقي حڪومت کان 17 وڏا اختيار صوبن کي منتقل ڪيا ويا هئا،خود صوبا انهن اختيارن کي ضلعي ۽ هيٺين سطح تائين منتقل ڪرڻ ۾ ناڪام ويا آهن،ان جو نتيجو اهو نڪتو آهي ته هاڻي مرڪز جهڙا صوبا وجود ۾ اچي ويا آهن، جتي تعليم، صحت، آباديءَ جي انتظام، ۽ زراعت جهڙا اهم شعبا ته منتقل ٿيا، پر انهن ۾ ڪا خاص بهتري يا تبديلي نظر نه ٿي اچي. هاڻوڪي انتظامي ڍانچي ۽ جسامت جي حوالي سان صوبن جو نظام بي اثر ۽ بنيادي سطح جي ماڻهن جي ضرورتن کان لاتعلق بڻجي ويو آهي ان کان علاوه، صوبا جڏهن آبادي جي بنياد تي اين ايف سي ايوارڊ لاءِ پرجوش انداز ۾ مقابلو ڪن ٿا، تڏهن ساڳئي اصول کي پنهنجي اندروني مالياتي ورهاست، يعني صوبائي فنانس ڪميشن (PFCs) ۾ نه ٿا اپنائين.هن چيو ته پاڪستان هڪ نازڪ پر اهم فيصلي جي ڪنڌيءَ تي بيٺل آهي،اختيارن سان مڪاني حڪومتون بڻايو يا پوءِ نوان صوبا ٺاهڻ لاءِ قومي مڪالمو شروع ڪيو،هن چيو ته ڀارت 1947ع کانپوءِ تقريبن درجن کان وڌيڪ نوان صوبا ٺاهي چڪو آهي،افغانستان جي آبادي 4 ڪروڙ 40 لک آهي ۽ اتي 34 صوبا آهن،ترڪيه جي آبادي 8 ڪروڙ 60 لک ۽ صوبا 81 آهن،پاڪستان لاءِ به وقت اچي ويو آهي ته اهو پنهنجي انتظامي نقشي تي نظرثاني ڪري،هن چيو ته يا ته واقعي بااختيار ضلعي سطح جا مڪاني حڪومتن جا نظام قائم ڪجن، جيڪي حڪمرانيءَ کي ماڻهن جي ويجهو آڻين،يا وري ملڪي سطح تي نئين صوبا ٺاهڻ بابت قومي بحث ۽ اتفاق راءِ جو عمل شروع ڪجي، ته جيئن حڪمراني وڌيڪ مؤثر ۽ ماڻهن جي ضرورتن سان هم آهنگ بڻجي سگهي.
