راولپنڊي (ويب ڊيسڪ) سيڪيورٽي فورسز پاڪستان ۽ افغانستان جي سرحد تي دراندازي جي وڏي ڪوشش ناڪام بڻائيندي 54 خارجين کي ماري ڇڏيو.
آءِ آيس پي آر موجب 25 ۽ 26 اپريل جي وچين رات ۽ وري 26 ۽ 27 اپريل جي رات اتر وزيرستان جي علائقي حسن خيل ۾ سيڪيورٽي فورسز خارجين جي ان وڏي گروهه جي چرپر کي نوٽ ڪيو، جيڪو پاڪستان ۾ داخل ٿيڻ جي ڪوشش ڪري رهيو هو.
سيڪيورٽي فورسز وقت سر ڪارروائي ڪندي خارجين جي دراندازي جي ڪوشش کي ناڪام بڻائي ڇڏيو، آپريشن دوران وڏي مقدار ۾ هٿيار، گولا، بارود ۽ ڌماڪيدار مواد برآمد ڪيو ويو.
آءِ ايس پي آر ٻڌايو ته انٽيليجنس رپورٽن موجب اهي خارجي پنهنجي پرڏيهي آقائن جي چوڻ تي پاڪستان ۾ وڏي پيماني تي دهشتگرد ڪارروائين لاءِ دراندازي ڪري رهيا هئا.
آءِ ايس پي آر موجب جڏهن ڀارت پاڪستان تي بي بنياد الزام هڻي رهيو آهي، اهڙي صورتحال ۾ خارجين جو اهي سرگرميون واضح ٿيون ڪن ته اهي ڪنهن جي اشاري تي ڪم ڪري رهيا آهن.
