اسلام آباد (ويب ڊيسڪ) قومي اسيمبلي ميمبر شير افضل مروت چيو آهي ته اڳوڻي وزيراعظم نواز شريف کي غلط ڪڍيو ويو، نواز شريف کي ان وقت جي اسٽيبلشمينٽ ۽ ثاقب نثار گڏجي ڪڍرايو، ان ۾ پي ٽي آءِ جو ڪو ڪردار نٿو ٿي سگهي.
نجي ٽي وي چينل جي پروگرام ۾ ڳالهائيندي شير افضل مروت چيو ته نواز شريف ۽ مون ۾ هڪجهڙائي آهي، نواز شريف کي به اڄ تائين سمجهه ۾ ناهي آيو ته کيس ڇو ڪڍيو ويو؟ ۽ مون کي ڇو ڪڍيو ويو؟ اها ڳالهه مون کي به ڪڏهن سمجهه ۾ نه ايندي.
هن چيو ته جڏهن پي ٽي آءِ باني کي سزائون ٻڌايون ويون ته ن ليگ ۽ پ پ جي ڪيمپ ۾ مٺايون ورهايون ويون، جڏهن نواز شريف کي ڪڍيو ويو ته پي ٽي آءِ ۾ مٺايون ورهايون ويون، ان ۾ ڪو شڪ ناهي ته جنرل (ر) قمر جاويد باجوا اڳوڻي چيف جسٽس ثاقب نثار سان گڏجي نواز شريف کي ڪڍرايو.
