اسلام آباد(م ڊ+عمر چيما)جميعت علماءِ اسلام (ف) جي سربراهه مولانا فضل الرحمان چيو آهي ته ملڪ جي سالميت بابت پاليسي ايوانن ۾ نه ٺهي رهي آهي، اها حڪومتي حلقن ۾ نه پر بند ڪمرن اندر، حڪومت کان مٿانهين، سياست کان مٿانهين، پارليامينٽ کان مٿانهين پاليسيون ٺاهيون پيون وڃن.قومي اسيمبلي ۾ اجلاس کي خطاب ڪندي هن چيو ته مسئلو رڳو هن ايوان جو ناهي، سڄو ملڪ پريشاني ۽ پريشاني ۾ مبتلا آهي،عام ماڻهو کي نه روزگار آهي نه جان ۽ مال جو تحفظ، هتي ادارا ملياميٽ ڪيا پيا وڃن،مولانا فضل الرحمان چيو ته لکين ماڻهو بيروزگار ٿي رهيا آهن، ان جي ڪير پرواهه ڪري؟ ظاهر آهي پارليامينٽ کي سوچڻو پوندو،جيڪڏهن حڪومت غلط فيصلو ڪري عوام جي مفاد خلاف فيصلو ڪري ته ملڪي معيشت تي ناڪاري اثر پون ٿا ته پوءِ پارلياماني فورم آهي جتي ان تي ڳالهه ٻولهه ٿيڻ گهرجي،هن چيو ته اسان کي هڪ لمحي لاءِ به رياست جي بقا ۽ سالميت بابت ڪجهه ڳالهائڻ يا تجويز ڪرڻ جي اجازت ناهي.هن چيو ته ان حوالي سان اسان کي سمجهڻ گهرجي ته هن وقت ٻن صوبن ۾ حڪومت جي ڪا به رٽ ناهي جيڪڏهن اڄ وزير اعظم شهباز شريف هن ايوان ۾ موجود هجي ها ته کيس ٻڌايان ها ته قبائلي علائقن ۾ ڇا ٿي رهيو آهي، بلوچستان ۾ ڇا ٿي رهيو آهي. پوءِ شايد وزيراعظم چوي ته مون کي ان بابت ڪا ڄاڻ ناهي.بلوچستان جا ضلعا هينئر آزادي جو اعلان ڪن ته گڏيل قومون انهن جي درخواست قبول ڪري وٺن،هن چيو ته فيصلا ڪير ڪري ٿو؟ ڪٿي فيصلا ٿيندا آهن؟ ان جي ذميواري سڀاڻي پاڪستان جي هوندي، حڪومت ۽ اپوزيشن ذميوار هوندا، پارليامينٽ به ذميوار هوندي، حقيقت اها آهي ته هن ملڪ ۾ ڪا به سول حڪمراني ناهي، ڪا به نظرياتي سياست ناهي.مولانا فضل الرحمان چيو ته پاڪستان ۾ مڪمل طور تي اسپيشل اسٽيبلشمينٽ،بند ڪمرن ۽ محلات ۾ جيڪو چاهي فيصلو ڪري ۽ حڪومت کي پنهنجي فيصلي تي آڱوٺو لڳائڻو پوندو آهي، اسان کي اتان نڪرڻو پوندو يا نه؟هن چيو ته اسان جي تمنا آهي ته اسٽيبلشمينٽ غيرسياسي هجي،اها بارڊر تي وڃي،پارليامينٽ سياستدانن حوالي ڪري،ڌانڌلي نه ڪري،ملڪي سياست کي آزاد ڇڏي ڏئي،هن چيو ته آمريڪا،چين ۽ روس سڀني جا هتي مفاد آهن،جنهن لاءِ اهي هٿ پير هڻي رهيا آهن،ڪا خبر ناهي ته اهي قبائلي علائقن تي قبضو ڪرڻ چاهيندا هجن،مولانا فضل الرحمان چيو ته صوبن جون اسيمبليون به عوام جون نمائنده اسيمبليون نه آهن، جڏهن عوام ٻاهر نڪرندو آهي ته وڏن وزيرن سميت ڪو به چونڊيل نمائندو عوام کي منهن ڏيڻ جي پوزيشن ۾ ناهي هوندو.
هيءَ خبر ۽ تجزيو، روزاني عوامي آواز، اڱارو 18 فيبروري 2025ع تي شايع ٿيو
