بارڊر – گواسڪر ٽرافي ۾ آسٽريليا جي خلاف آخري ٽيسٽ ۾ ڀارت کي ٻي اننگز ۾ 145 رنز جي سرسي ته حاصل آهي، پر ميچ کان وڌيڪ بحث ڀارتي ٽيم جي ٽن مختلف ڪپتانن تي ٿي رهيو آهي.
پهريون ڪپتان روهت شرما، جنهن پنهنجي مرضي سان آخري ميچ نه کيڏڻ جو فيصلو ڪيو. ٻيو جسپريت بمرا جيڪو انجري سبب ميچ دوران گرائونڊ ڇڏي ويو ۽ ٽيون ويرات ڪوھلي جنهن بمرا جي غير موجودگيءَ ۾ ڪپتاني جون ذميواريون سنڀاليون.
سڊني ٽيسٽ جي ٻئي ڏينهن دوران محمد سراج ۽ پراسيڌ ڪرشنا جي بهترين بالنگ جي نتيجي ۾ آسٽريليا جي ٽيم 181 رنز تي آل آئوٽ ٿي وئي، جنهن بعد ڀارت کي چئن رنسن جي سرسي حاصل ٿي، ان کانپوءِ ڀارت ٻي اننگز شروع ڪئي ۽ ٻئي ڏينهن جي پڄاڻي تائين ڇهن وڪيٽن جي نقصان تي 141 رنسون ٺاهي ورتيون .
وڪيٽ ڪيپر بيٽر رشڀ پنت جي جارحاڻي بيٽنگ ڀارتي ٽيم هڪ ڀيرو ٻيهر مقابلي ۾ واپس آڻي بيهاريو، هو 61 رنسون ٺاهي آئوٽ ٿيو، سندس اننگز ۾ چار ڇڪا ۽ ڇهه چوڪا پڻ شامل هئا.
سيريز ۾ آسٽريليا کي ٻه هڪ جي سرسي حاصل آهي.
مان رڳو ميچ کان ٻاهر آهيان، رٽائر نه ٿيو آهيان: روهت شرما
ميچ ۾ ٽيم جي قيادت نه ڪندڙ ڪپتان روهت هڪ انٽرويو ۾ وضاحت ڪئي ته کيس نه ته آرام ڏنو ويو آهي نه ئي ڊراپ ڪيو ويو آهي، هن مُرڪندي چيو ”مون پاڻ ئي آخري ميچ نه کيڏڻ جو فيصلو ڪيو هو.“
روهت شرما چيو ”مان ميچ کان اڳ ڪوچ ۽ سليڪٽرن کي چيو ته مان فارم ۾ نه آهيان، هي اهم ميچ آهي، اسان کي جيڪي رانديگر فارم ۾ آهن انهن کي کيڏائڻ گهرجي. “
هن وڌيڪ چيو” بيٽر اڳ ئي آئوٽ آف فارم آهن، جيڪڏهن ٽيم ۾ وڌيڪ آئوٽ آف فارم رانديگر هوندا ته مسئلو وڌندو، اها ڳالهه منهنجي ذهن ۾ هئي ۽ مون سمجهيو ته ٽيم لاءِ اهو ئي بهتر فيصلو آهي.“
روهت چيو”مون لاءِ اهو فيصلو ڏکيو هو، پر اهو صحيح فيصلو هو. مون گهڻو اڳتي سوچڻ نه چاهيو. بس اهو خيال ڪيو ته هن وقت ٽيم کي ڇا گهرجي.“
هن وڌيڪ وضاحت ڪندي چيو” هي فيصلو منهنجي رٽائرمينٽ جو ناهي نه ئي آئون ڪرڪيٽ ڇڏي رهيو آهيان، مان فقط ان ڪري ميچ کان ٻاهر آهيان، ڇو ته منهنجو بيٽنگ فارم ٺيڪ ناهي.“
روهت شرما چيو ته ” اهو ڪو به يقين سان نٿو چئي سگهجي ته پنج مهينن يا ٻن مهينن کانپوءِ به منهنجي بيٽ نه هلندي، ڪرڪيٽ ۾مان ڪيئي ڀيرا اهڙي صورتحال کي منهن ڏئي چڪو آهيان.“
ڀارتي ڪپتان چيو ته ” زندگي هر پل بدلجي ٿي، پنهنجي قابليت تي يقين آهي ته حالتون بهتر ٿينديون، پر مان حقيقت پسند پڻ آهيان.“
هن واضح ڪيو” ماڻهو اهو فيصلو نٿا ڪري سگهن ته اسان ڪڏهن وڃون، ڪڏهن نه کيڏون يا ڪڏهن قيادت ڇڏي ڏيون.“
روهت چيو ته ” مان مان سياڻو ماڻهو ۽ ٻن ٻارن جو پيءُ آهيان، تنهنڪري مون وٽ اهو شعور آهي ته منهنجي زندگي ۾ ڇا ضروري آهي.“
انٽرويوءَ جي پڄاڻي تي، روهت شرما رٽائرمينٽ جي حوالي سان هلندڙ افواهن کي رد ڪندي چيو” مان ڪيڏانهن به نه پيو وڃان.“
بمرا جي انجري، ٽيم مئنيجمينٽ ڳڻتي ۾ مبتلا
سڊني ٽيسٽ جي ٻئي ڏينهن ماني جي وقفي کانپوءِ بمرا انجري سبب ميدان کان ٻاهر هليو ويو، بعد هو ڊاڪٽر ۽ سيڪيورٽي آفيسر سان گڏ اسپتال روانو ٿي ويو.
ميچ کانپوءِ ڀارتي بالر پراسيڌ ڪرشنا ٻڌايو ته بمرا کي چيلهه ۾ تڪليف محسوس رهي هئي، ياد رهي ته 2022ع ۾ به بمرا چيلهه جي انجري سبب هڪ سال تائين ڪرڪيٽ کان پري رهيو هو.
بارڊر گواسڪر ٽرافي جي پنجن ميچن ۾ بمرا جي ڪارڪردگي انتهائي شاندار رهي آهي. هنيئر تائين13 جي ايوريج سان 32 شڪار ڪري چڪو آهي.
روهت ۽ بمرا جي غير موجودگيءَ ۾ ڪوهلي ڪپتان
روهت شرما ۽ جسپريت بمرا جي غير موجودگي ۾ ويرات ڪوهلي عارضي طور تي ڪپتاني جون ذميواريون سنڀاليون.
هن سيريز ۾ ڪوهليءَ تي تنقيد ٿي رهي آهي ڇو ته پنجن ٽيسٽ ميچن دوران هو بيٽنگ ذڪر جوڳي ڪارڪردگي نه ڏيکاري سگهيو آهي.
پر ڪجهه ڀارتي مداحن ڪوهلي جي ڪپتاني جي انداز کي ساراهيندي چيو ته هڪ موقعي تي 162 رنسن تي 6 رانديگر آئوٽ هئا، پر ڪوهلي اهڙا فيصلا ڪيا جو پوري آسٽريلوي ٽيم 181 رنسن تي ڍير ٿي وئي.
بمرا جي انجري بابت اَپ ڊيٽ جاري
جسپريت بمرا بيٽنگ جي انجري بابت اَپ ڊيٽ جاري ڪندي ميڊيڪل ٽيم ٻڌايو ته فاسٽ بالر بيٽنگ لاءِ تيار آهي، جڏهن ته سندس بالنگ بابت حتمي فيصلو سڀاڻي صبح ڪيو ويندو.
ميڊيڪل ٽيم موجب، بمرا کي چيلهه ۾ هلڪي تڪليف سبب احتياطي معائني لاءِ اسپتال وٺي وڃڻو پيو، رپورٽس ۾ ڪا به سنگين ڳالهه سامهون نه آئي آهي.
ميڊيڪل ٽيم جو چوڻ آهي ته بمرا بيٽنگ لاءِ ٺيڪ آهي، پر هو بالنگ ڪندو يا نه ان حوالي سان سڀاڻي صبح حتمي فيصلو ڪيو ويندو
ميڊيڪل ٽيم موجب، بمرا جو مسلسل معائنو ڪيو پيو وڃي ته جيئن ڪنهن به خطرناڪ صورتحال کان بچي سگهجي.
