ڍاڪا (ويب ڊيسڪ) بنگلاديش ۾ سپريم ڪورٽ جي اڳوڻي جج شمس الدين چوڌري مانڪ کي عدالت ۾ پيشي جي موقعي تي عوام تشدد جو نشانو بڻائي ڇڏيو.
بنگلاديشي ميڊيا موجب گذريل ڏينهن بنگلاديشي سپريم ڪورٽ جي ايپلٽ ڊويزن جي اڳوڻي جج کي سلهٽ جي عدالت ۾ آندو ويو ته قيدين جي وين مان نڪرندي ئي عوام مٿس لتن ۽ مڪن جو وسڪارو لائي ڏنو.
رپورٽن موجب مختلف جماعتن جي اڳواڻن ۽ ڪارڪنن اڳوڻي جج تي پاڻي جي بوتلن، بيضن ۽ جوتن سان به حملو ڪيو، جنهن کانپوءِ 75 ورهين جي اڳوڻي جج کي اسپتال نيو ويو، جتي کيس انتهائي نگهداشت جي وارڊ ۾ رکيو ويو آهي.
اسپتال ذريعن موجب جسٽس مانڪ جي جسم تي ڪيترائي زخم موجود هئا ۽ سندس حالت ڳڻتيءَ جوڳي آهي.
واضح رهي ته جمعي ڏينهن بنگلاديشي سپريم ڪورٽ جي اڳوڻي جج کي ڀارت فرار ٿيندي ڀارتي سرحد ڀرسان گرفتار ڪيو ويو هو.
