ڍاڪا ( ويب ڊيسڪ ) بنگلاديش ۾ جاري مظاهرن جي وچ ۾ ڀارتي ڪرڪيٽر ويرات ڪوهليءَ جي هم شڪل هڪ همراهه جي وڊيو وائرل ٿي رهي آهي جيڪو احتجاج دوران سخت نعريبازي ڪري رهيو آهي.
سوشل ميڊيا تي وائرل وڊيو ۾ ڏسي سگهجي ٿو ته ويرات ڪوهلي جو هم شڪل کي بنگلاديشي نوجوان ڪلهي تي کنيون بيٺا آهن ۽ شيخ حسينه ۽ عوامي ليگ حڪومت خلاف سخت نعريبازي ڪري رهيو آهي.
وائرل وڊيو ۾ ويرات ڪوهليءَ جي هم شڪل همراهه کي انڊين پريميئر ليگ جي فرنچائز رائل چئلينجر بئنگلورو جي ٽوپي پاتل آهي.
پهرين نظر ۾ اِهو محسوس ٿي رهيو آهي ته اِهو ڀارتي ڪرڪيٽر ويرات ڪوهليءَ ئي آهي جيڪو بنگلاديشي مظاهرين سان يڪجهتي جو اظهار لاءِ احتجاج ۾ شامل ٿيو آهي.
پرڏيهي ميڊيا موجب، ڄاڻايل وڊيو پنج آگسٽ جي آهي، جڏهن بنگلاديشي وزيراعظم شيخ حسينه واجد جي استعيفيٰ ڏئي ڀارت فرار ٿيڻ جي خبر سامهون آئي هئي جنهن کانپوءِ وڏي انگ ۾ بنگلاديشي عوام روڊن تي جشن ملهائڻ لاءِ نڪري آيو هو.
